جموں/۱۸مارچ
مرکزی وزیر داخلہ امیت شاہ جموں کشمیر کے دو روزہ دورے پر جمعے کی شام کو جموں پہنچے ۔
مرکزی وزیر داخلہ کا جموں ہوائی اڈے پر وفاقی وزیر مملکت ڈاکٹر جتندر سنگھ ‘جموں وکشمیر یونٹ کے صدر رویندر رینہ ، کوندر گھپتا اور دوسرے سینئر لیڈران نے اُن کا استقبال کیا۔
ایک سرکاری عہدیدار نے کہا کہ جموں پہنچنے پر، وزیر داخلہ راج بھون گئے جہاں وہ فوج، نیم فوجی دستوں، پولیس اور انٹیلی جنس ایجنسیوں کے سینئر افسران کے ساتھ سیکورٹی جائزہ اجلاس کی صدارت کریں گے۔
ہفتہ کی صبح وزیر داخلہ جموں کے ایم اے اسٹیڈیم میں سی آر پی ایف کی۸۳ویں یوم تاسیس پریڈ میں شرکت کریں گے۔عہدیدار نے کہا’’وہ سالانہ امرناتھ یاترا کیلئے کئے جانے والے انتظامات کا بھی جائزہ لیں گے، جو کووڈ۱۹ کی وبا کی وجہ سے دو سال کے وقفے کے بعد منعقد ہونے جا رہی ہے‘‘۔
پانچ ماہ سے بھی کم عرصے میں مرکزی وزیر داخلہ کا جموں و کشمیر کا یہ دوسرا دورہ ہے۔ انہوں نے گزشتہ سال۲۳ سے۲۷؍ اکتوبر تک ریاست کا پانچ دن کا دورہ کیا تھا۔
وزیر داخلہ کے جموں دورے کے پیش نظر پورے صوبے میں سیکورٹی کو ہائی الرٹ پر رکھا گیا ہے ۔
ذرائع کا کہنا ہے کہ سی آر پی ایف ، بی ایس ایف ، آرمی اور سراغ رساں ایجنسیوں کے سینئر آفیسران ایک روز قبل ہی جموں وارد ہوئے ہیں۔
ذرائع کا یہ بھی کہنا ہے کہ مرکزی وزیر داخلہ امیت شاہ جموں وکشمیر یوٹی کے ایل جی منوج سنہا سے بھی ملاقات کریں گے ۔
حکام نے جموں صوبے کے قرب و جوار میں سکیورٹی کے سخت انتظامات کئے ہیں اور کسی بھی ممکنہ ناخوشگوار واقعے کو ناکام بنانے کیلئے بھاری تعداد میں سکیورٹی اہلکاروں کو تعینات کیا گیا ہے ۔
ایک سینئر پولیس آفیسر نے بتایا کہ وزیر داخلہ کے دورے کے پیش نظر جموں میں سکیورٹی کے سخت انتظامات کئے گئے ہیں۔انہوں نے بتایا’’شہر میں مختلف مقامات پر عارضی ناکے بٹھائے گئے ہیں۔ اس کے علاوہ سرحدی علاقوں میں نگرانی بڑھائی گئی ہے ۔‘‘