سوشل میڈیا پر سرکارکی تنقید

سرینگر/۱۸مارچ
سوشل میڈیا پر مبینہ طور حکومت کی تنقید کرنے کی پاداش میں جموں و کشمیر لیفٹیننٹ گورنر انتظامیہ کی جانب سے ایک ٹیچر سمیت دو سرکاری ملازمین کو وجہ بتائو نوٹس جاری کیے گئے ہیں۔
محکمہ تعلیم میں کام کرنے والے ملازمین میں ایک ملازم سرکاری مڈل اسکول دْپتیار‘اسلام آباد میں بطور ٹیچر کام کر رہے ہیں جبکہ دوسرا شخص شمالی کشمیر کے کپوارہ ضلع کے گورنمنٹ ہائی اسکول رنگ پائین مچھل میں جونیئر اسسٹنٹ ہے۔
ذرائع کے مطابق ڈائریکٹر اسکول ایجوکیشن نے ان کے خلاف‘ وجہ بتاؤ (شو کاز) نوٹس جاری کیا ہے جس میں کہا گیا ہے کہ ’’یہ دونوں سوشل میڈیا پر قابل اعتراض سرگرمیوں میں ملوث ہیں۔ اور ایسا کرکے انہوں نے جموں اینڈ کشمیر گورنمنٹ ایمپلائیز قواعد۱۹۷۱ کی سراسر خلاف ورزی کی ہے۔
مذکورہ ملازمین سے کہا گیا ہے کہ وہ دس دن کے اندر اپنی پوزیشن کی وضاحت کریں ورنہ انہیں قواعد کے تحت کارروائی کا سامنا کرنا پڑے گا۔