افغانستان کے خلاف ٹیسٹ کے لیے ہردوئے اور ذاکر علی کی بنگلہ دیش ٹیم میں واپسی

ڈھاکہ، 19 ستمبر (یو این آئی) بنگلہ دیش کرکٹ بورڈ (بی سی بی) نے متحدہ عرب امارات (یو اے ای) میں افغانستان کے خلاف ہونے والے واحد ٹیسٹ کے لیے تیز گیندباز تسکین احمد کو آرام دیا ہے، جبکہ توحید ہردوئے اور ذاکر علی کی ٹیم میں واپسی ہوئی ہے۔
بی سی بی نے ہفتہ کو 9 سے 13 اکتوبر تک یو اے ای میں کھیلے جانے والے ٹیسٹ کے لیے 15 رکنی ٹیم کا اعلان کیا۔ تسکین کے علاوہ وکٹ کیپر بلے باز امت حسن کو بھی ٹیم میں شامل نہیں کیا گیا ہے۔ ہردوئے کو جنوبی افریقہ اے کے خلاف پوچےفسٹروم میں ناٹ آؤٹ 350 رنز کی شاندار اننگز کھیلنے کے چند ہفتوں بعد ٹیسٹ ٹیم میں جگہ ملی ہے۔
علی کو ابتدا میں آسٹریلیا کے خلاف سیریز کے لیے ٹیسٹ ٹیم میں شامل کیا گیا تھا، کیونکہ لٹن داس کی دورے پر شرکت مشکوک تھی۔ تاہم لٹن کے وقت پر فٹ ہوجانے کے بعد ذاکر علی کو ٹیم سے باہر کردیا گیا تھا۔ جنوبی افریقہ اے کے خلاف جس میچ میں ہردوئے نے 350 رنز بنائے تھے، اسی مقابلے میں علی نے بھی 94 رنز کی اننگز کھیلی تھی۔
افغانستان کے خلاف دوبارہ ٹیم میں شامل کیے جانے سے قبل علی نے بنگلہ دیش کے لیے اپنا آخری ٹیسٹ جولائی 2025 میں گال میں سری لنکا کے خلاف کھیلا تھا۔