سرینگر؍۱۵ستمبر
ایک نیا مغربی ہواؤں کا نظام (ویسٹرن ڈسٹربنس)۱۶ ستمبر سے۱۸ ستمبر کی صبح تک جموں و کشمیر کو متاثر کرنے کا امکان ہے، جس کے نتیجے میں مختلف علاقوں میں بارش، گرج چمک اور بالائی علاقوں میں ہلکی برفباری متوقع ہے۔
موسمی پیش گوئی کے مطابق کل دوپہر تک موسم زیادہ تر خشک رہنے کا امکان ہے، تاہم دوپہر کے بعد سے شام کے دوران شمالی کشمیر اور بالائی علاقوں میں بارش اور گرج چمک کے ساتھ بوندا باندی شروع ہو سکتی ہے۔ بعد ازاں رات کے اوقات میں یہ سلسلہ وسطی اور جنوبی کشمیر کے علاوہ جموں ڈویژن کے کئی علاقوں تک پھیلنے کا امکان ہے۔
۱۷ ستمبر کو جموں و کشمیر کے بیشتر مقامات پر ہلکی سے درمیانی بارش متوقع ہے، جبکہ جنوبی کشمیر، پیر پنجال اور چناب وادی کے چند مقامات پر شدید بارش بھی ہو سکتی ہے۔
اس دوران بعض مقامات پر بجلی کی گھن گرج اور تیز ہواؤں کے ساتھ گرج چمک کا بھی امکان ظاہر کیا گیا ہے۔
بالائی علاقوں میں ہلکی برفباری بھی متوقع ہے، جن میں زوجیلا، رضدان ٹاپ، سادھنا ٹاپ، سنتھن ٹاپ، مرگن ٹاپ، پیر کی گلی اور گلمرگ، سونمرگ و پہلگام کے بالائی علاقے شامل ہیں۔
موسمی نظام کے اثر سے جموں و کشمیر کے مختلف علاقوں میں دن کے درجہ حرارت میں کمی آنے کا امکان ہے، جبکہ۱۷ستمبر کو وادی کشمیر میں درجہ حرارت میں نمایاں کمی متوقع ہے۔
۔۔۔۔۔
ایجنسیاں
