پنجاب میں لٹیروں کا گروہ چلا رہے ہیں بھگونت مان: بی جے پی

نئی دہلی 03 ستمبر (یو این آئی) بھارتیہ جنتا پارٹی نے پنجاب کے وزیر اعلیٰ بھگونت مان پر لٹیروں کا ریکیٹ (گروہ) چلانے کا الزام لگاتے ہوئے الزامات کی تصدیق کے لیے ایک آڈیو کلپ جاری کیا۔
بی جے پی ترجمان پردیپ بھنڈاری نے جمعرات کو پارٹی ہیڈکوارٹر میں صحافیوں سے خطاب کرتے ہوئے کہا کہ مسٹر مان ایک گروہ چلا رہے ہیں، اور ان کی اہلیہ پر بچولیوں کے ذریعے پانچ کروڑ لے کر ریپ کے معاملات کو ختم کرنے کا الزام ہے۔ اس دوران انہوں نے ایک آڈیو کلپ دکھائی اور کہا کہ یہ پہلی نظر میں دکھاتا ہے کہ مسٹر مان ریپ کے ایک معاملے کو ختم کرانے کی کوشش کر رہے ہیں۔ مسٹر بھنڈاری نے وزیر اعلیٰ سے ان کی اہلیہ ڈاکٹر گرپریت کور سے متعلق رشوت کے معاملے میں وضاحت دینے کا مطالبہ کیا ہے۔ انہوں نے کہا، "کیا وزیر اعلیٰ کا گھر ایسی جگہ بن گیا ہے جہاں سودے ہوتے ہیں اور ‘کٹ منی’ (رشوت کا حصہ) مسٹر اور پنجاب کے ‘سپر وزیر اعلیٰ’ اروند کیجریوال کے پاس جاتی ہے؟”
اس دوران انہوں نے کہا کہ مسٹر مان اور مسٹر کیجریوال کو بتانا چاہیے کہ کیا وزیر اعلیٰ اور ان کی اہلیہ ریپ کے معاملات کو ختم کرنے کے لیے پیسے لینے کا کوئی گروہ چلا رہے ہیں؟ کیا وزیر اعلیٰ دفتر بدعنوانی کا اڈہ بن گیا ہے؟ آج کیجریوال کو جواب دینا ہوگا کہ بدعنوانی کی حد اتنی بڑھ گئی ہے کہ اب کیجریوال اور مان حکومت ریپ متاثرین کو بھی نہیں بخش رہی ہے۔ بی جے پی ترجمان نے کہا کہ پنجاب میں بدعنوانی اس حد تک پہنچ گئی ہے کہ مان حکومت ریپ متاثرین کو بھی نہیں بخش رہی ہے؟ انہوں نے سوال کیا کہ کیا مسٹر مان پنجاب میں بھی ویسا ہی گروہ چلا رہے ہیں جیسا مسٹر کیجریوال نے دہلی میں چلایا تھا؟
اس دوران انہوں نے جھارکھنڈ میں طلبا کے احتجاجی مظاہرے کے معاملے پر کانگریس لیڈر راہل گاندھی اور جھارکھنڈ کے وزیر اعلیٰ ہیمنت سورین کو گھیرا اور کہا کہ جھارکھنڈ میں طلبا نے احتجاجی مظاہرہ کیا اور پورا ملک ان کی حمایت میں کھڑا ہوا، لیکن اب، جیسے جیسے جانچ آگے بڑھ رہی ہے، یہ بات سامنے آ رہی ہے کہ ٹی ڈی پی ایل نامی ایک بلیک لسٹڈ کمپنی کو جھارکھنڈ حکومت نے امتحان کرانے کی ذمہ داری سونپی تھی۔ جھارکھنڈ حکومت نے اس سلسلے میں ٹینڈر بھی جاری نہیں کیا تھا۔ اس کے بعد ٹی ڈی پی ایل نے یہ معاہدہ ایک نامعلوم کمپنی، ‘پکر ٹیکنالوجی’ کو سونپ دیا، لیکن اس معاہدے کا کوئی کاغذی ریکارڈ نہیں ہے۔ سارا لین دین نقد میں ہوا۔
مسٹر بھنڈاری نے کہا کہ پکر ٹیکنالوجی کے ڈائریکٹر نے سنٹرل انویسٹی گیشن ڈیپارٹمنٹ (سی آئی ڈی) کے سامنے قبول کیا ہے کہ انہیں دیے گئے ٹینڈر کی کوئی کاپی نہیں ہے اور سارا لین دین نقد میں ہوا تھا؛ اس سے پتہ چلتا ہے کہ مسٹر گاندھی اور مسٹر سورین طلبا کو کیسے انصاف دلاتے ہیں۔