زمین کے ریکارڈ اور ڈیجیٹل لون کو جوڑنے کے لیے وزارتِ دیہی ترقی اور آر بی آئی کے درمیان میٹنگ

نئی دہلی، 18 جولائی (یو این آئی) وزارتِ دیہی ترقی کے تحت آنے والے محکمہ برائے اراضی وسائل نے حال ہی میں ریزرو بینک آف انڈیا (آر بی آئی) کے ساتھ ایک اہم میٹنگ کی۔ اس میٹنگ کا مقصد زمین کے ریکارڈ اور ڈیجیٹل طریقے سے لیے جانے والے قرض کے نظام کو آپس میں جوڑنے کے طور طریقوں پر تبادلۂ خیال کرنا تھا، تاکہ دونوں کو ملا کر عام آدمی کے لیے پریشانیاں کم کی جا سکیں۔
یہاں جاری ایک سرکاری پریس ریلیز میں یہ معلومات دی گئی ہے۔ اس میں بتایا گیا کہ محکمہ برائے اراضی وسائل کے سکریٹری نریندر بھوشن کی صدارت میں ہوئی اس میٹنگ میں آر بی آئی انوویشن ہب کے چیف ایگزیکٹو آفیسر ساحل کینی اور دیگر سینئر حکام شامل ہوئے۔ اس بات چیت کا سب سے بڑا مقصد یہ تھا کہ زمین کے ریکارڈ اور بینک کے لون دینے والے نظام میں تال میل کیسے بٹھایا جائے۔ اس سے کسانوں اور گاؤں میں رہنے والے لوگوں کو بغیر کسی پریشانی کے، محفوظ طریقے سے اور ان کی مرضی سے آسانی سے لون مل سکے گا۔
میٹنگ میں شامل حکام نے اس بات پر تبادلۂ خیال کیا کہ اگر زمین کے کاغذات پوری طرح اصلی اور ڈیجیٹل طور پر بینکوں سے جڑے ہوں گے، تو سرکاری بینکوں سے لون لینا کتنا آسان ہو جائے گا۔ اس سے لون دینے کے کام میں پوری شفافیت آئے گی اور کام بھی تیزی سے ہوگا۔
اس کے علاوہ زمین کے پکے ڈیجیٹل ریکارڈ کو محفوظ اور آسان طریقے سے بینکوں تک پہنچانے، کسان کریڈٹ کارڈ (کے سی سی) اور کھیتی کسانی سے جڑے دوسرے لون کو ڈیجیٹل طریقے سے جلدی دلوانا، قرض لینے میں آنے والے اخراجات کو کم کرنا اور کاغذی کارروائی میں لگنے والے وقت کو بچانا نیز دھوکہ دہی کو روکنا، تاکہ کوئی بھی شخص ایک ہی زمین کے ٹکڑے پر الگ الگ بینکوں سے کئی بار قرض نہ لے سکے، جیسے معاملات پر بھی بحث کی گئی۔
میٹنگ میں یہ بھی تبادلۂ خیال کیا گیا کہ زمین کو ایک قابلِ بھروسہ ڈیجیٹل اثاثہ بنانا ہوگا تاکہ اس کے دم پر غریب سے غریب شخص کو بھی بینک سے آسانی سے قرض مل سکے۔ اس کے لیے تمام محکمے ڈیٹا کا ایک جیسا پیمانہ اپنائیں، کمپیوٹر سسٹم کو آپس میں جوڑیں، زمین کی شناخت نمبر کے استعمال کو فروغ دیں اور محکمہ اراضی و بینکوں کے درمیان تال میل کو اور مضبوط کریں۔
محکمے نے یقین دلایا کہ وہ آر بی آئی انوویشن ہب اور باقی محکموں کے ساتھ مل کر ایک ایسا محفوظ اور عوام کے کام آنے والا ڈیجیٹل نظام تیار کریں گے، جس سے ملک کے گاؤوں میں لون ملنے میں آسانی ہو اور زمین سے جڑے سارے کام بھی بہتر طریقے سے ہو سکیں۔