سرینگر؍۱۴؍اگست
یوم آزادی کی تقریب کے موقع پر جموں کشمیر پولیس کے۵۱؍اہلکاروں کو بہادری اور بہترین خدمات کے تمغوں کے لیے منتخب کیا گیا ہے، جس کے ساتھ جموں و کشمیر ملک کا سب سے زیادہ اعزاز حاصل کرنے والی یونین ٹیریٹری بن گئی ہے۔
اعزاز حاصل کرنے والے۵۱؍افراد کے ساتھ جموں و کشمیر ملک بھر میں چوتھے نمبر پر ہے، جبکہ اس سال ملک کی بہترین کارکردگی دکھانے والی پولیس فورسز میں بھی شامل ہو گیا ہے۔
وزارت داخلہ نے یوم آزادی کے موقع پر ان اعزازات کا اعلان کیا ہے۔ وزارت کی جانب سے جاری ریاست وار تفصیلات کے مطابق جموں و کشمیر پولیس کے اہلکاروں کو۳۸ میڈلز فار گیلنٹری‘ ایک پریزیڈنٹس میڈل فار ڈسٹنگویشڈ سروس اور۱۳میڈلز فار میریٹوریئس سروس دیے گئے ہیں۔ اس طرح جموں و کشمیر کے تمغوں کی مجموعی تعداد۵۱ تک پہنچ گئی ہے۔
اس کامیابی کے ساتھ جموں و کشمیر ملک بھر میں چوتھے نمبر پر ہے۔ اس سے آگے چھتیس گڑھ، اتر پردیش اور مہاراشٹرا ہیں۔ تاہم، تمام مرکز کے زیر انتظام علاقوں میں جموں و کشمیر سب سے آگے ہے۔
ریاست چھتیس گڑھ۱۵۲ ؍اعزاز یافتگان کے ساتھ پہلے نمبر پر، اتر پردیش کے۹۳ ؍اور مہاراشٹرا کے۶۰ پولیس اہلکاروں کو اعزازات کے لیے منتخب کیا گیا ہے۔ ملک بھر میں پولیس ڈیمپارٹمنٹ میں مجموعی طور پر۲۷۲؍ اہلکاروں کو میڈل فار گیلنٹری‘ ۸۳و پریزیڈنٹس میڈل فار ڈسٹنگوئشڈ سروس اور۶۰۶ کو میڈل فار میریٹوریئس سروس کے لیے منتخب کیا گیا۔ اس طرح پولیس کے مجموعی اعزاز یافتگان کی تعداد۹۶۱ رہی۔
یہ تمغے فرائض کی انجام دہی کے دوران غیر معمولی بہادری، نمایاں قیادت اور پولیسنگ و اندرونی سلامتی کے شعبے میں مسلسل بہترین خدمات کے اعتراف میں دیے جاتے ہیں۔
جموں و کشمیر پولیس کے لیے اس سال کے اہم ترین اعزازات میں سینئر سپرنٹنڈنٹ آف پولیس شوکت حسین شاہ کو دیا جانے والا پریزیڈنٹس میڈل فار ڈسٹنگوئشڈ سروس بھی شامل ہے۔ وہ مرکز کے زیر انتظام علاقے سے یہ باوقار اعزاز حاصل کرنے والے واحد افسر ہیں۔ جموں و کشمیر کو سب سے زیادہ تمغے بہادری کے زمرے میں ملے، جہاں۳۸؍ افسران اور اہلکاروں کو بہادری اور بہترین عملی کارکردگی پر اعزاز سے نوازا گیا۔
اعزاز یافتگان کو مبارکباد دیتے ہوئے جموں و کشمیر پولیس نے کہا ہے کہ یہ اعزاز فورس کے عزم، پیشہ ورانہ صلاحیت اور فرض شناسی کی عکاسی کرتے ہیں۔
جموں و کشمیر پولیس نے ایک بیان میں کہا، ’’جموں و کشمیر پولیس اپنے تمام افسران اور جوانوں کو مبارکباد پیش کرتی ہے جنہیں پریزیڈنٹس پولیس میڈل فار ڈسٹنگوئشڈ سروس، پولیس میڈل فار میریٹوریئس سروس اور پولیس میڈل فار گیلنٹری سے نوازا گیا ہے۔ ان کی مثالی خدمات فرض شناسی کی ایک قابلِ تقلید مثال ہیں۔‘‘
۔۔۔۔۔۔
