(ڈی آئی پی آر )
سرینگر؍ یکم اگست
لیفٹیننٹ گورنر منوج سنہا نے آج لوک بھون میں جموں و کشمیر پولیس کے شہید ہیڈ کانسٹیبل عاشق حسین قریشی کے فرزند ابصار عاشق قریشی کو ہمدردانہ بنیادوں پر تقرری نامہ سونپا۔ اس موقع پر شہید اہلکار کے اہلِ خانہ بھی موجود تھے۔
لیفٹیننٹ گورنر نے۲۲ جولائی۲۰۲۶ کو ضلع اننت ناگ میں دہشت گردانہ حملے کے دوران فرض کی ادائیگی کرتے ہوئے جامِ شہادت نوش کرنے والے ہیڈ کانسٹیبل عاشق حسین قریشی کو خراجِ عقیدت پیش کیا اور ان کے اہلِ خانہ کو حکومت کی جانب سے ہر ممکن تعاون کا یقین دلایا۔
واضح رہے کہ گزشتہ ہفتے لیفٹیننٹ گورنر نے ضلع بڈگام کے بیروہ علاقے کے لالپورہ گاؤں میں شہید ہیڈ کانسٹیبل کے اہلِ خانہ سے ملاقات کر کے ان سے اظہارِ تعزیت کیا تھا۔
دریں اثنا، لیفٹیننٹ گورنر منوج سنہا نے ہفتہ کے روز جموں و کشمیر پولیس کے شہید انسپکٹر مسرور علی وانی کی اہلیہ انشاء نذیر کو بھی ہمدردانہ بنیادوں پر تقرری نامہ فراہم کیا، جس کے ذریعے انتظامیہ نے فرض کی انجام دہی کے دوران جان کا نذرانہ پیش کرنے والے سیکورٹی اہلکاروں کے خاندانوں کی فلاح و بہبود کے لیے اپنے عزم کا اعادہ کیا۔
اس موقع پر لیفٹیننٹ گورنر نے شہید انسپکٹر مسرور علی وانی کی عظیم قربانی کو خراجِ عقیدت پیش کرتے ہوئے سوگوار خاندان سے گہری تعزیت اور ہمدردی کا اظہار کیا۔
انہوں نے یقین دلایا کہ حکومت مستقبل میں بھی شہداء کے اہلِ خانہ کے ساتھ مضبوطی سے کھڑی رہے گی اور انہیں ہر ممکن مدد اور تعاون فراہم کیا جائے گا۔
یہ ہمدردانہ تقرری حکومت کی اس پالیسی کے تحت عمل میں لائی گئی ہے، جس کا مقصد دورانِ ملازمت شہید ہونے والے سیکورٹی اہلکاروں کے زیرِ کفالت افراد کو مالی اور سماجی تحفظ فراہم کرنا، انہیں بروقت امداد مہیا کرنا اور باعزت بحالی کے مواقع فراہم کرنا ہے۔
یہ اقدام سیکورٹی فورسز کی قربانیوں کو خراجِ تحسین پیش کرنے اور شہداء کے اہلِ خانہ کی عملی مدد کے لیے حکومت کے مسلسل عزم کا مظہر قرار دیا جا رہا ہے۔
