ایجنسیاں
ہندواڑہ؍ یکم اگست
شمالی کشمیر کے ضلع ہندواڑہ کے ماور علاقے میں ہفتہ کے روز ایک نجی اسکول کے احاطے میں لینڈ سلائیڈنگ کے نتیجے میں سات سالہ طالب علم جاں بحق ہوگیا۔
متوفی کی شناخت ریحان احمد ڈار ولد ریاض احمد ڈار ساکن خودی ماور کے طور پر ہوئی ہے۔ وہ فرنٹ لائن اسکول، ماور کا طالب علم تھا۔
حکام کے مطابق مسلسل شدید بارشوں کے دوران اسکول کے احاطے میں اچانک لینڈ سلائیڈنگ ہوئی، جس کی زد میں آ کر کمسن طالب علم ملبے تلے دب گیا۔
بچے کو فوری طور پر نیو ٹائپ پرائمری ہیلتھ سینٹر (این ٹی پی ایچ سی)، قلم آباد منتقل کیا گیا، جہاں ڈاکٹروں نے اسے مردہ قرار دیا۔
اس افسوسناک واقعے کے بعد پورے علاقے میں غم کی لہر دوڑ گئی ہے، جبکہ سوگوار خاندان اور مقامی آبادی صدمے میں ہے۔
پولیس نے واقعے کا نوٹس لیتے ہوئے قانونی کارروائی شروع کر دی ہے۔
