ایرانی فوج کا کویت میں امریکی فوجی اڈے پر ڈرون حملے کا دعویٰ

تہران، 31 جولائی (یو این آئی) ایرانی فوج نے جزیرہ قشم پر حملے کا جواب دیتے ہوئے کویت میں موجود امریکی فوجی اہداف کو ڈرونز سے نشانہ بنانے کا دعویٰ کیا ہے۔
بی بی سی فارسی کے مطابق ایرانی فوج نے ’آپریشن صاعقہ‘ کے ستائیسویں مرحلے کے تحت چند گھنٹے قبل کویت میں واقع احمد الجابر ایئر بیس پر حملہ کیا۔ اس کارروائی کے دوران امریکی فوج کے جنگی طیاروں، سیٹلائٹ مواصلاتی نظام اور گودام کو ڈرونز کے ذریعے نشانہ بنایا گیا۔
تاہم، ان ڈرون حملوں کی نوعیت اور ان کے نتیجے میں ہونے والے ممکنہ جانی یا مالی نقصانات کے حوالے سے تاحال مزید تفصیلات سامنے نہیں آ سکی ہیں۔
رپورٹ کے مطابق یہ حملہ جزیرہ قشم میں ایک رہائشی مکان پر امریکی حملے کے ردعمل میں کیا گیا۔ایرانی فوج کا کہنا ہے کہ کویت میں واقع احمد الجابر فضائی اڈہ خطے میں امریکی فضائی نگرانی اور عسکری آپریشنز کے لیے ایک اہم مرکز کی حیثیت رکھتا ہے۔
یاد رہے کہ ایران کے جنوبی علاقوں پر امریکی فضائی حملے کے نتیجے میں میاں بیوی اور ان کا 2 سالہ بچہ شہید ہو گیا، امریکا نے جزیرے قشم میں رہائشی عمارت کو نشانہ بنایا تھا، جس کے نتیجے میں متعدد بچے زخمی ہو گئے جبکہ ایک بچے کو ملبے سے زندہ نکال لیا گیا۔
میڈیا رپورٹس کے مطابق امدادی ٹیمیں ملبہ ہٹانے اور لاپتہ افراد کو نکالنے میں مصروف ہیں۔ایرانی حکام کے مطابق امریکی میزائل حملے کے بعد جزیرے میں بجلی کی فراہمی عارضی طور پر معطل ہونے کے بعد بحال ہو گئی۔
ادھر ایرانی پارلیمنٹ کے اسپیکر محمد باقر قالیباف نے کہا ہے کہ امریکہ کو اپنے مظالم کی بھاری قیمت چکانا ہوگی، کیونکہ اسے بے گناہوں کا خون بہا کر بدلہ لینے کی عادت پڑ چکی ہے سماجی رابطے کی ویب سائٹ ایکس پر جاری اپنے بیان میں انہوں نے الزام عائد کیا کہ امریکہ روزانہ کسی نہ کسی نئے جرم کا ارتکاب کرکے اپنے ہاتھ مزید خون سے آلودہ کر رہا ہے جزیرہ قشم میں شہریوں کے رہائشی مکانات پر حملہ امریکی مظالم کا تسلسل ہے۔ ایرانی اسپیکر کا مزید کہنا تھا کہ میناب اور لامرد میں کیے گئے حملے بھی اسی بربریت کی کڑی ہیں۔ امریکہ کو میدانِ جنگ میں ملنے والی ناکامیوں کا غصہ بے گناہ شہریوں کو نشانہ بنا کر نکالنے کی عادت ہے۔
اس سے قبل ایرانی وزارتِ خارجہ کے ترجمان اسماعیل بقائی نے قشم جزیرے پر امریکی حملے کی شدید مذمت کرتے ہوئے کہا کہ اس حملے میں میاں بیوی اور ان کا 2 سالہ بچہ شہید ہوا۔ ان کا مزید کہنا تھا کہ ہر دھماکے، ہر جرم، ہر پابندی، ہر دھمکی اور ہر بچے کے قتل کے ساتھ آپ ایرانی عوام کو اپنے وطن کے دفاع کیلئے مزید پرعزم اور متحد بنا دیتے ہیں۔