ایجنسیاں
سرینگر؍۲۳ جولائی
جموں و کشمیر اسمبلی کی مراعاتی کمیٹی (کمیٹی آن پرولیجز) پیپلز ڈیموکریٹک پارٹی (پی ڈی پی) کے رکن اسمبلی وحید پرہ کے خلاف دائر مراعات کی خلاف ورزی کے معاملے کی سماعت کے لیے جمعہ کو یہاں اجلاس منعقد کرے گی۔
اسمبلی سیکریٹریٹ نے وحید پرہ کو ہدایت دی ہے کہ وہ جمعہ کو صبح۱۱ بجے مراعاتی کمیٹی کے نو رکنی اجلاس میں پیش ہوں۔ کمیٹی کی صدارت نیشنل کانفرنس کے رکن اسمبلی حسنین مسعودی کر رہے ہیں۔
واضح رہے کہ نومبر۲۰۲۴ میں نیشنل کانفرنس کے رکن اسمبلی نذیر احمد گریزی کی شکایت پر وحید پرہ کے خلاف مراعات کی خلاف ورزی کا نوٹس جاری کیا گیا تھا۔
گریزی نے الزام عائد کیا تھا کہ۸نومبر۲۰۲۴ کو لیفٹیننٹ گورنر کے خطاب پر اظہارِ تشکر کی تحریک پر بحث کے دوران وحید پرہ نے اپنی تقریر میں توہین آمیز ریمارکس کیے اور بے بنیاد الزامات عائد کیے۔
ابتدائی نوٹس کے جواب میں وحید پرہ نے کسی بھی قسم کی غلطی سے انکار کرتے ہوئے کہا تھا کہ یہ کارروائی اختلافِ رائے کو دبانے کی کوشش ہے۔
بعد ازاں اسپیکر نے وحید پرہ کے جواب کو غیر اطمینان بخش قرار دیتے ہوئے معاملہ مزید غور و خوض کے لیے اسمبلی کی مراعاتی کمیٹی کے سپرد کر دیا تھا۔
