ایجنسیاں
سرینگر؍۲۱ جولائی
جموں و کشمیر میں طبی تعلیم کے شعبے کو مزید تقویت دیتے ہوئے وزیر صحت و طبی تعلیم سکینہ ایتو نے منگل کو اعلان کیا کہ گورنمنٹ میڈیکل کالج (جی ایم سی) راجوری میں ایم بی بی ایس کی مزید۵۰نشستوں کی منظوری دے دی گئی ہے، جس کے بعد کالج کی سالانہ داخلہ گنجائش۱۰۰سے بڑھ کر۱۵۰ نشستیں ہو گئی ہے۔
سکینہ نے سوشل میڈیا پلیٹ فارم ایکس پر ایک پوسٹ میں کہا کہ جی ایم سی راجوری میں ایم بی بی ایس نشستوں میں اضافہ سے طبی تعلیم حاصل کرنے کے خواہشمند طلبہ کو مزید مواقع میسر آئیں گے، جبکہ جموں و کشمیر کے صحت کے شعبے کو بھی مزید تقویت ملے گی۔
موصوفہ نے اپنی پوسٹ میں لکھا’’مجھے یہ اطلاع دیتے ہوئے خوشی ہو رہی ہے کہ گورنمنٹ میڈیکل کالج جموں اور گورنمنٹ میڈیکل کالج سری نگر میں ایم بی بی ایس نشستوں میں کامیاب اضافے کے بعد اب گورنمنٹ میڈیکل کالج راجوری میں بھی مزید۵۰؍ ایم بی بی ایس نشستوں کی منظوری دے دی گئی ہے، جس کے بعد کالج کی داخلہ گنجائش ۱۰۰ سے بڑھ کر۱۵۰نشستیں ہو گئی ہے‘‘۔
وزیر نے مزید کہا’’محترم وزیر اعلیٰ عمر عبداللہ کی بصیرت افروز قیادت میں ہم طبی تعلیم کو مضبوط بنانے، مستقبل کے ڈاکٹروں کے لیے مواقع میں توسیع کرنے اور جموں و کشمیر کے عوام کے لیے ایک مضبوط اور زیادہ قابلِ رسائی صحت کا نظام قائم کرنے کے لیے پُرعزم ہیں۔‘‘
