ایجنسیز
سرینگر؍۱۳جون
شمالی کشمیر کے ضلع کپواڑہ میں سمری گاؤں کے نزدیک ایک پاکستانی شہری کو مبینہ طور پر مشتبہ حالات میں لائن آف کنٹرول (ایل او سی) عبور کرنے کے بعد گرفتار کر لیا گیا ہے۔ بھارتی فوج نے ہفتہ کے روز اس کی تصدیق کی۔
چنار کور نے سوشل میڈیا پلیٹ فارم ایکس پر ایک پوسٹ میں کہا کہ مخصوص خفیہ اطلاع کی بنیاد پر فوج اور جموں و کشمیر پولیس نے مشترکہ کارروائی کرتے ہوئے مشتبہ شخص کو گرفتار کیا اور کسی بھی ممکنہ سیکورٹی خطرے کو بروقت ناکام بنا دیا۔
فوج کے مطابق}}مخصوص انٹیلی جنس اطلاعات کی بنیاد پر چوکنا چنار واریئرز نے جموں و کشمیر پولیس کے ساتھ مشترکہ آپریشن میں۱۲ جون۲۰۲۶ کو سمری گاؤں، کپواڑہ کے نزدیک ایک پاکستانی شہری کو گرفتار کیا، جس نے مشتبہ حالات میں لائن آف کنٹرول عبور کی تھی۔ مستعد مشترکہ ٹیم نے فوری کارروائی کرتے ہوئے اسے حراست میں لیا اور کسی بھی ممکنہ سیکورٹی خلاف ورزی کو روک دیا‘‘۔
فوج نے مزید بتایا کہ گرفتار شخص سے تفتیش جاری ہے اور اس کے سرحد عبور کرنے کے حالات، مقاصد اور ممکنہ روابط کے بارے میں تحقیقات کی جا رہی ہیں۔
بیان کے مطابق’’گرفتار فرد سے فی الحال پوچھ گچھ کی جا رہی ہے اور یہ جاننے کے لیے تحقیقات جاری ہیں کہ اس نے کن حالات میں سرحد عبور کی اور آیا اس کے کسی تنظیم یا دیگر عناصر سے روابط یا مخصوص مقاصد تھے یا نہیں‘‘۔
حکام نے اس معاملے کی مزید تفصیلات فوری طور پر جاری نہیں کی ہیں، تاہم سیکورٹی ایجنسیاں واقعے کے تمام پہلوؤں کا باریک بینی سے جائزہ لے رہی ہیں۔
