جموں میں نئے آر ایم سی کا افتتاح‘ جموں و کشمیر، لداخ اور ہماچل پردیش کو خصوصی موسمی خدمات، آفات سے متعلق انتباہات فراہم کری گا:ڈاکٹر جتیندر
ایجنسیز
جموں؍۵جون
مرکزی وزیر برائے سائنس و ٹیکنالوجی اور ارضیاتی علوم ڈاکٹر جتیندر سنگھ نے جمعہ کے روز کہا کہ جموں میں قائم کیا گیا نیا علاقائی موسمیاتی مرکز ملک کا ساتواں علاقائی موسمیاتی مرکز( آر ایم سی) بن گیا ہے، جو جموں و کشمیر، لداخ اور ہماچل پردیش کو خصوصی موسمی خدمات، آفات سے متعلق انتباہات اور ہمالیائی خطے کی ضروریات کے مطابق موسمیاتی معاونت فراہم کرے گا۔
ڈاکٹر سنگھ نے جموں میں نئے آر ایم سی کا افتتاح کرتے ہوئے اعلان کیا کہ جلد ہی لکھنؤ میں بھی ایک ایسا ہی مرکز قائم کیا جائے گا، جس سے بھارت کے علاقائی موسمیاتی پیش گوئی کے نیٹ ورک کو مزید وسعت ملے گی۔
مرکزی وزیر نے کہا کہ یہ نیا مرکز ایسے خطے میں موسمی نگرانی، پیش گوئی اور قبل از وقت انتباہی نظام کو مضبوط بنائے گا، جہاں میدانوں سے لے کر بلند پہاڑوں تک متنوع جغرافیائی حالات پائے جاتے ہیں۔
اس مرکز کے ذریعے ضلعی سطح کی موسمی پیش گوئیاں، پہاڑی علاقوں کے لیے خصوصی موسمی اطلاعات، سیاحتی مشورے، شہروں کے لیے مخصوص موسمی خدمات اور اچانک آنے والے سیلاب، بادل پھٹنے، برفانی تودے گرنے، شدید برفباری، گرج چمک کے طوفان اور لینڈ سلائیڈنگ سے متعلق بروقت انتباہات جاری کیے جائیں گے۔
داکٹر سنگھ نے کہا کہ ان خدمات سے امرناتھ یاترا اور ویشنو دیوی یاترا کے زائرین، کسان، ٹرانسپورٹ آپریٹرز، پن بجلی منصوبے، ڈیزاسٹر مینجمنٹ ادارے اور دشوار گزار علاقوں میں تعینات سکیورٹی فورسز کو فائدہ پہنچے گا۔
گزشتہ ایک دہائی کے دوران جموں و کشمیر اور لداخ میں موسمیاتی بنیادی ڈھانچے کی توسیع کا ذکر کرتے ہوئے ڈاکٹر سنگھ نے کہا کہ۲۰۱۴میں اس خطے میں ایک بھی ڈوپلر ویدر ریڈار موجود نہیں تھا، جبکہ اب جموں، سرینگر، لیہہ اور بنیہال ٹاپ میں چار ڈوپلر ریڈار کام کر رہے ہیں۔
مرکزی وزیر نے بتایا کہ مشن موسم کے تحت اننت ناگ، راجوری، بارہمولہ، کشتواڑ اور ڈوڈہ میں مزید پانچ ڈوپلر ریڈار نصب کرنے کی تجویز ہے۔
ڈاکٹر سنگھ نے کہا کہ مشاہداتی نیٹ ورک میں بھی نمایاں توسیع ہوئی ہے۔ اس وقت خطے میں۵۶ موسمیاتی مراکز فعال ہیں، جن میں۱۵ دستی مشاہداتی مراکز،۲۵ خودکار موسمیاتی اسٹیشن (اے ڈبلیو ایس) اور۱۶ خودکار بارش پیما آلات (اے آر جی) شامل ہیں، جبکہ۲۰۱۴میں صرف۱۳؍اے ڈبلیو ایس اور۱۴؍ اے آر جی موجود تھے۔
حال ہی میں کارگل، رام بن ضلع کے اُکھرال اور ماتا ویشنو دیوی بھون میں بھی خودکار موسمیاتی اسٹیشن نصب کیے گئے ہیں۔ موجودہ مالی سال کے دوران مزید آٹھ اے ڈبلیو ایس اور پانچ اے آر جی نصب کیے جانے کی توقع ہے۔
انہوں نے کہا کہ ڈیلی رین فال مانیٹرنگ اسکیم کے تحت بارش کی نگرانی کرنے والے مراکز کی تعداد۲۰۱۴ کے۳۰ مراکز سے بڑھ کر اب۸۵ہو گئی ہے، جس سے بارش کی نگرانی اور پیش گوئی کی صلاحیت میں نمایاں بہتری آئی ہے۔
