کنارے پر ٹینٹ کا سامان دھو رہے تھے کہ پھسل کر ڈوب گئے
حاجن؍۸مئی
شمالی کشمیر کے ضلع بانڈی پورہ کے حاجن علاقے میں دریائے جہلم میں ڈوبنے سے تین نوجوان جاں بحق ہوگئے۔ حکام نے جمعہ کو یہ جانکاری دی۔
حکام کے مطابق یہ افسوسناک واقعہ چک چندرگیر علاقے میں اُس وقت پیش آیا جب تینوں نوجوان مبینہ طور پر دریائے جہلم کے کنارے ٹینٹ کا سامان دھو رہے تھے اور اچانک پھسل کر دریا میں جا گرے۔
واقعے کے فوراً بعد مقامی لوگوں اور رضاکاروں نے ریسکیو آپریشن شروع کیا۔ ابتدائی تلاش کے دوران دو لاشیں برآمد کی گئیں، جبکہ مسلسل ریسکیو کارروائی کے بعد تیسری لاش بھی نکال لی گئی۔
جاں بحق نوجوانوں کی شناخت عادل احمد ڈار (۱۸) ولد بشیر احمد ڈار، سمیر احمد ڈار(۲۲) ولد محمد جمال ڈار، اور سہیل احمد ڈار(۲۲) ولد غلام نبی ڈار، ساکنان چندرگیر حاجن، کے طور پر ہوئی ہے۔
حکام نے بتایا کہ تینوں لاشوں کو قانونی و طبی کارروائی مکمل کرنے کیلئے نزدیکی اسپتال منتقل کیا گیا ہے۔
دریں اثنا لیفٹیننٹ گورنر منوج سنہا اور وزیر اعلیٰ عمرعبداللہ نے واقعہ پر گہرے رنج و غم کااظہار کیا ہے ۔
اپنے تعزیتی پیغام میں لیفٹیننٹ گورنر نے کہا’’انڈی پورہ میں پیش آئے افسوسناک ڈوبنے کے حادثے میں قیمتی نوجوان جانوں کے ضیاع پر مجھے انتہائی دکھ پہنچا ہے۔ میری ہمدردیاں اور دعائیں غمزدہ خاندانوں کے ساتھ ہیں۔ ہم اس کٹھن گھڑی میں سوگوار خاندانوں کے ساتھ مکمل یکجہتی کے ساتھ کھڑے ہیں‘‘۔
وزیر اعلیٰ نے پیش آئے دلخراش ڈوبنے کے حادثے پر گہرے رنج و غم کا اظہار کیا ہے، جس میں جمعہ کے روز تین کمسن لڑکوں کی جانیں ضائع ہو گئیں۔
تینوں نوجوان، جو چندرگیر حاجن کے رہائشی تھے، شمالی کشمیر کے ضلع بانڈی پورہ کے حاجن علاقے کے چیک چندرگیر مقام پر دریائے جہلم میں ڈوب گئے۔
وزیر اعلیٰ نے سوگوار خاندانوں کے ساتھ دلی تعزیت کا اظہار کرتے ہوئے مرحومین کی ابدی مغفرت اور درجات کی بلندی کے لیے دعا کی۔انہوں نے غمزدہ خاندانوں کے لیے اس کٹھن گھڑی میں صبر جمیل اور حوصلے کی بھی دعا کی۔
