فیروز پورہ ٹنگمرگ میں سمگلر کی دکان منہدم‘کیفے کی دکان سربمہر‘کولگام میں سمگلروں کا زمین پر سے قبضہ چھڑ ا لیا گیا
(ویب ڈیسک)
سرینگر؍۸مئی
جموں و کشمیر میں منشیات کے خلاف سب سے بڑی کارروائی کے تحت ضلع اننت ناگ میں تقریباً۶ء۵ کروڑ روپے مالیت کی منشیات سے منسلک جائیدادیں ضبط کر لی گئی ہیں۔ پولیس نے جمعہ کو یہ جانکاری دی۔
پولیس کے ایک ترجمان نے بتایا کہ منشیات کے نیٹ ورک کے خلاف جاری سخت کارروائی کے سلسلے میں اننت ناگ پولیس نے این ڈی پی ایس ایکٹ کی متعلقہ دفعہ کے تحت بشیر احمد میر اور ان کے اہل خانہ، ساکنان ڈونی پورہ سنگم، کے خلاف ضبطی کی کارروائی شروع کی۔
ترجمان نے کہا کہ تحقیقات کے دوران یہ بات سامنے آئی کہ خاندان نے اپنی معلوم قانونی آمدنی سے کہیں زیادہ منقولہ اور غیر منقولہ جائیدادیں جمع کی ہیں۔
تحقیقات سے معلوم ہوا کہ یہ جائیدادیں خاندان کے افراد کی مشترکہ ملکیت میں تھیں اور شبہ ہے کہ یہ منشیات کی غیر قانونی تجارت سے حاصل شدہ آمدنی سے خریدی گئی ہیں۔
ترجمان کے مطابق تحقیقات کے دوران خاندان کا مجرمانہ ریکارڈ بھی سامنے آیا، جس سے پتہ چلا کہ این ڈی پی ایس ایکٹ کے تحت تین ایف آئی آر درج کی جا چکی ہیں۔ پہلی ایف آئی آر سال۲۰۱۱میں درج ہوئی تھی، جس دوران بشیر احمد میر کے والد گل محمد کے قبضے سے۱ء۱کلوگرام چرس برآمد ہوئی تھی۔
دوسرا مقدمہ۲۰۲۰میں درج کیا گیا تھا، جس میں بشیر احمد میر کے قبضے سے۵۰۰گرام چرس برآمد ہوئی، جبکہ تیسرا مقدمہ۲۰۲۴میں درج ہوا، جس دوران۵۸ء۹۰کلوگرام پوست کا بھوسہ برآمد کیا گیا تھا۔
انہوں نے بتایا کہ ضبط یا منسلک کی گئی جائیدادوں میں سنگم میں واقع دو منزلہ رہائشی مکان، نیا تعمیر شدہ رہائشی مکان، ایک تجارتی عمارت، سنگم/نینہ علاقے میں۲۱۱مرلہ زمین اور ایک گاڑی شامل ہے۔ترجمان نے کہا کہ ضبط شدہ جائیدادوں کی مجموعی مالیت تقریباً۶ء۵ کروڑ روپے ہے۔
ادھر بارہمولہ پولیس نے محکمہ مال اور گلمرگ ڈولپمنٹ اتھارٹی (جی ڈی اے) کے اشتراک سے ٹنگمرگ علاقے میں منشیات سے متعلق جرائم میں ملوث افراد کے خلاف کارروائی کی۔
پولیس کے مطابق فیروزپورہ ٹنگمرگ میں مشترکہ کارروائی کے دوران بدنام زمانہ منشیات فروش امتیاز احمد میر ولد عبدالمجید میر، ساکن فیروزپورہ ٹنگمرگ، کی ایک دکان کو پولیس اور محکمہ مال کے افسران نے منہدم کر دیا۔ ترجمان نے کہا کہ یہ کارروائی منشیات کے نیٹ ورک کے ڈھانچے کو ختم کرنے اور سخت پیغام دینے کی مہم کا حصہ ہے۔
ایک اور کارروائی میں جی ڈی اے کی آؤٹ سورس پراپرٹی ’نارتھ ونڈ کیفے‘ کو چیف ایگزیکٹو آفیسر، جی ڈی اے نے سیل کر دیا۔ مذکورہ پراپرٹی کے لیز ہولڈر یاسین کھانڈے کے خلاف پولیس پوسٹ واگورہ میں این ڈی پی ایس ایکٹ کے تحت مقدمہ درج ہے۔
پولیس نے بتایا کہ پولیس اسٹیشن گلمرگ کا پورا دائرہ جی ڈی اے کی زمین پر واقع ہے اور وہاں موجود تمام جائیدادیں سرکاری زمین پر قائم ہیں۔ حکام نے ملزم کو دی گئی لیز منسوخ کرنے سمیت مزید کارروائی بھی شروع کر دی ہے۔
پولیس نے منشیات کے خاتمے کے اپنے عزم کا اعادہ کرتے ہوئے کہا کہ منشیات فروشوں اور ان کی معاونت کرنے والوں کے خلاف ایسی سخت کارروائیاں جاری رہیں گی تاکہ نوجوانوں کو محفوظ بنایا جا سکے اور منشیات سے پاک معاشرہ قائم ہو۔
دریں اثناکولگام پولیس نے محکمہ مال کے تعاون سے ضلع کولگام کے کنڈ علاقے میں مبینہ منشیات فروشوں کے غیر قانونی قبضے سے تقریباً۶۰لاکھ روپے مالیت کی کاہچرائی زمین واگزار کرائی۔
حکام کے مطابق مشترکہ کارروائی گاؤں اوریل، کنڈ میں انجام دی گئی جہاں مجموعی طور پر۶کنال کاہچرائی زمین واگزار کی گئی۔
تفصیلات کے مطابق سروے نمبر۱۸۲من کے تحت ایک کنال زمین مبینہ منشیات فروش غلام نبی بٹ، داماد فتح محمد بٹ، کے غیر قانونی قبضے میں تھی۔ اسی طرح سروے نمبر۱۴۲ کے تحت۳کنال زمین غلام نبی بٹ ولد عبدالغنی بٹ کے مبینہ قبضے سے واگزار کرائی گئی۔
اس کے علاوہ سروے نمبر۱۴۲من کے تحت۲ کنال زمین بھی گاؤں اوریل کنڈ کے ان افراد کے قبضے سے واگزار کرائی گئی جو مبینہ طور پر پولیس اسٹیشن کنڈ میں درج ایک ایف آئی آر میں ملوث ہیں۔
پولیس کے مطابق واگزار کرائی گئی زمین کی مارکیٹ مالیت تقریباً۶۰لاکھ روپے ہے۔پولیس اور محکمہ مال کی اس مشترکہ کارروائی کو ضلع میں منشیات فروشوں کے غیر قانونی مالیاتی و انفراسٹرکچر نیٹ ورک کو ختم کرنے کی مسلسل کوششوں کا حصہ قرار دیا گیا ہے۔
پولیس نے ایک بار پھر واضح کیا کہ منشیات کے ناسور کے خاتمے کے لیے کارروائیاں جاری رہیں گی اور اس کاروبار میں ملوث افراد کے خلاف سخت اقدامات کیے جائیں گے۔
