ایجنسیز
نئی دہلی؍۸مئی
مرکزی حکومت نے جموں و کشمیر کے لیفٹیننٹ گورنر (ایل جی) کو عوامی تحفظ یا قومی ایمرجنسی کے حالات میں ٹیلی کام خدمات سے متعلق اختیارات استعمال کرنے کی منظوری دے دی ہے، جن میں سگنلز کی نگرانی، سروس معطل کرنا اور پیغامات کو ڈی کرپٹ کرنا شامل ہے۔
جاری کردہ حکم نامے کے مطابق، صدرِ جمہوریہ نے ایل جی کو ہدایت دی ہے کہ وہ ٹیلی کمیونیکیشن ایکٹ۲۰۲۳ کی دفعہ۲۰(۲)کے تحت ریاستی حکومت کے اختیارات اور فرائض انجام دیں۔ یہ دفعہ عوامی تحفظ اور قومی سلامتی سے متعلق ہنگامی حالات سے متعلق ہے اور اس کا اطلاق جموں و کشمیر کے مرکز کے زیر انتظام علاقے میں ہوگا۔
گزٹ میں جمعرات کو شائع شدہ نوٹیفکیشن میں کہا گیا ہے’’آئین ہند کے آرٹیکل۲۳۹کی شق(۱)کے تحت حاصل اختیارات کا استعمال کرتے ہوئے، صدرِ جمہوریہ ہدایت دیتے ہیں کہ جموں و کشمیر کے مرکز کے زیر انتظام علاقے کے ایڈمنسٹریٹر (خواہ وہ لیفٹیننٹ گورنر کہلائے) صدر کے کنٹرول کے تحت اور اگلے احکامات تک، ٹیلی کمیونیکیشن ایکٹ۲۰۲۳ کی دفعہ۲۰ کی ذیلی دفعہ(۲) کے تحت ریاستی حکومت کے اختیارات اور فرائض انجام دیں گے‘‘۔
ان اختیارات کے تحت لیفٹیننٹ گورنر کسی بھی عوامی ایمرجنسی یا عوامی تحفظ کے مفاد میں ٹیلی کام سگنلز کی ترسیل روک سکتے ہیں، پیغامات کی نگرانی یا ان کی ڈی کرپشن کا حکم دے سکتے ہیں، اور ٹیلی کام خدمات معطل کر سکتے ہیں۔
