ایجنسیز
جموں؍۳۱مارچ
توی ندی میں پیش آئے دلخراش واقعے میں تیسرے لڑکے کی لاش بھی منگل کے روز برآمد کر لی گئی، جو دو دیگر لڑکوں کے ساتھ تیز بہاؤ میں بہہ گیا تھا۔
یہ واقعہ جموں کے مضافاتی علاقے نگروٹا سینک اسکول کے قریب پیش آیا، حکام نے بتایا۔
حکام کے مطابق دو لڑکوں کی لاشیں پیر کے روز ہی نکال لی گئی تھیں، جبکہ تیسری لاش منگل کو جائے وقوعہ سے تقریباً آدھا کلومیٹر نیچے سے برآمد ہوئی۔ انسپکٹر ونود کمار نے اس کی تصدیق کی۔
ڈوبنے والے تینوں نوعمر لڑکوں کی شناخت بویش کول‘ سونم دت اور آدتیہ پنڈت کے طور پر ہوئی ہے، جن کا تعلق کشمیری پنڈت برادری سے تھا۔ یہ تینوں اتوار کے روز ندی کے تیز بہاؤ میں بہہ گئے تھے۔
حکام نے بتایا کہ لاشوں کو پوسٹ مارٹم کے لیے گورنمنٹ میڈیکل کالج اسپتال جموں منتقل کر دیا گیا ہے۔
ابتدائی اطلاعات کے مطابق لڑکے ندی کے کنارے والی بال کھیل رہے تھے، جس کے بعد وہ نہانے کے لیے پانی میں اترے اور تیز بہاؤ کی زد میں آ کر بہہ گئے۔
لیفٹیننٹ گورنر منوج سنہا اور وزیر اعلیٰ عمر عبداللہ نے اس واقعے پر گہرے دکھ اور افسوس کا اظہار کیا ہے، جس میں تین کمسن جانیں ضائع ہوئیں۔
