’حکومت اس بات کو یقینی بنانے کیلئے ضروری اقدامات کر رہی ہے کہ اس کا بوجھ خاندانوں اور کسانوں پر نہ پڑے‘
ایجنسیز
نوئیڈا؍۲۸مارچ
وزیر اعظم نریندر مودی نے ہفتہ کے روز کہا کہ بھارت مغربی ایشیا میں جاری تنازع سے پیدا ہونے والے چیلنجز کا پوری قوت کے ساتھ مقابلہ کر رہا ہے۔
نوئیڈا کے جیور میں نوئیڈا انٹرنیشنل ایئرپورٹ کے افتتاح کے موقع پر ایک تقریب سے خطاب کرتے ہوئے وزیر اعظم نے کہا کہ حکومت اپنے شہریوں کے تحفظ کیلئے تمام ضروری اقدامات کر رہی ہے۔
مودی نے کہا’’مغربی ایشیا میں ایک ماہ سے زائد عرصے سے تنازع جاری ہے۔ بھارت اس چیلنج کا پوری طاقت کے ساتھ سامنا کر رہا ہے‘‘۔
وزیر اعظم نے اس بات پر روشنی ڈالتے ہوئے کہ بھارت خام تیل اور گیس کیلئے ان خطوں پر انحصار کرتا ہے جو اس وقت تنازع سے متاثر ہیں، کہا’’حکومت اس بات کو یقینی بنانے کیلئے ضروری اقدامات کر رہی ہے کہ اس کا بوجھ خاندانوں اور کسانوں پر نہ پڑے‘‘۔
نوئیڈا انٹرنیشنل ایئرپورٹ کا افتتاح کرتے ہوئے وزیر اعظم نے کہا’’آج ترقی یافتہ اتر پردیش اور ترقی یافتہ بھارت کے سفر میں ایک نئے باب کا آغاز ہو رہا ہے‘‘۔
مودی نے کہا کہ نوئیڈا انٹرنیشنل ایئرپورٹ خطے میں اقتصادی سرگرمیوں کو فروغ دے گا۔ ان کاکہنا تھا’’یہ ایئرپورٹ مغربی اتر پردیش کے کسانوں، چھوٹے تاجروں اور نوجوانوں کیلئے نئے مواقع پیدا کرے گا‘‘۔
اس موقع پر اتر پردیش کے وزیر اعلیٰ یوگی آدتیہ ناتھ، شہری ہوا بازی کے وزیر کِنجرپو رام موہن نائیڈو اور دیگر معززین بھی موجود تھے۔
وزیر اعظم کے دورے کے پیش نظر سکیورٹی کے سخت انتظامات کیے گئے تھے۔
تقریباً۱۱۲۰۰کروڑ روپے کی لاگت سے تعمیر کیے جانے والے اس ایئرپورٹ کے پہلے مرحلے کو ایک ملٹی ماڈل ٹرانسپورٹ ہب کے طور پر تیار کیا جا رہا ہے، جس میں سڑک، ریل، میٹرو اور علاقائی ٹرانسپورٹ نظام کے ذریعے مربوط رابطہ فراہم کیا جائے گا۔
سرکاری بیان کے مطابق، اس منصوبے میں ایک کارگو ہب بھی شامل ہے جس کی ابتدائی سالانہ ہینڈلنگ صلاحیت۲ء۵لاکھ میٹرک ٹن سے زائد ہوگی، جسے بڑھا کر تقریباً۱۸لاکھ میٹرک ٹن تک کیا جا سکے گا۔ ایئرپورٹ کی ابتدائی مسافر گنجائش سالانہ ایک کروڑ۲۰لاکھ ہوگی، جسے بڑھا کر۷کروڑ تک کیا جا سکے گا۔
وزیر اعظم نے ایئرپورٹ کے ٹرمینل کا بھی معائنہ کیا۔
