حرمین میں لاکھوں زائرین کے لیے بہترین انتظامات کے اہداف حاصل کرلیے‘ادارہ امور حرمین کا اعلان
ویب ڈیسک
سرینگر؍۲۰مارچ
سعودی وزارتِ حج و عمرہ کا کہنا ہے کہ’ رواں برس رمضان المبارک میں بیرون مملکت سے آنے والے عمرہ زائرین کی تعداد۱ء۶۸ملین رہی ہے۔‘
ایس پی اے کے مطابق وزارت کی جانب سے جاری اعداد وشمار میں بتایا گیا کہ ’مسجد نبوی میں ریاض الجنہ کے لیے۱۱لاکھ زائرین نے پرمٹ لیے، جن کا تعلق۱۵۵ملکوں سے تھا۔‘
مکہ مکرمہ، جدہ اور مدینہ منورہ میں۳۰ نسک کیئرسینٹرز سے۱۱زبانوں میں ایک لاکھ۵۳ہزار خدمات فراہم کی ہیں۔زائرین کی دیکھ بھال اور رہنمائی مراکز جن کی تعداد۱۹۶۶ ہے، سے ایک لاکھ۹۷ہزار افراد نے رجوع کیا۔
رمضان المبارک کے دوران فیلڈ مانیٹرنگ ٹیموں نے رہائشی سیکٹرز کے۲۱ہزار۵۰۰وزٹ کیے جن کا مقصد زائرین کو فراہم کی جانے والی خدمات کے معیار کو جانچنا تھا۔
اس سے قبل مکہ مکرمہ ومشاعر مقدسہ رائل کمیشن نے بیان میں کہا تھا کہ ’رمضان المبارک کے ابتدائی پندرہ دنوں میں مکہ مکرمہ کی حدود میں موجود میقیات کی مساجد میں تقریبا دو ملین عمرہ زائرین کی آمد ریکارڈ کی گئی۔‘
’ مملکت کے مختلف شہروں سے رمضان المبارک میں عمرے کی ادائیگی کے لیے مکہ مکرمہ (میقات) آنے والی گاڑیوں کی تعداد۲لاکھ۹۱ہزار۹۴رہی۔‘
دریں اثنا ادارہ امور حرمین نے رمضان۱۴۴۷ ہجری کے آپریشنل پلان کی کامیابی کا اعلان کیا ہے، حرمین میں لاکھوں زائرین کے لیے بہترین انتظامات کے اہداف حاصل کرلیے۔
ایس پی اے کے مطابق ادارہ حرمین کا کہنا تھا دنیا کے سب سے بڑے کراوڈ کنٹرول مینجمنٹ آپریشنز میں ایک کو غیر معمولی دیکھ بھال کے ساتھ منظم کیا گیا۔ اتنے بڑے منصوبے کو کامیاب کرنا محض اتفاقی واقعہ نہیں بلکہ یہ جامع پروگرام پر عملدرآمد کا نتیجہ ہے۔
آپریشنل پلان میں فعال منصوبہ بندی کے ساتھ ادارہ امور حرمین کے ساتھ دیگر اداروں کا بھر پور تعاون شامل تھا جن میں سکیورٹی، امن عامہ، فیلڈ آپریشنز اور صحت کی ٹیمیں شامل ہیں۔
بیان میں کہا گیا کہ’ یہ کامیابی اللہ رب العزت کے خاص فضل و کرم اور مکہ مکرمہ و مدینہ منورہ گورنرٹیس کے بھرپور تعاون سے ممکن ہوئی ہے۔’
اس سال معیاری اقدامات کے تحت ٹریکس اور راستوں کو منظم کیا گیا ، مسجد الحرام میں الیکٹرک گاڑیوں اور ویل چیئر کے لیے راستوں کو جدا رکھا گیا ، ہوٹلوں سے معمر اور معذور افراد کو مسجد الحرام لانے کی سروس بھی مہیا کی گئی۔
اس کے علاوہ زائرین کی سہولت کے لیے تھری ڈی میپس اور رہنمائی کے لیے گراونڈ ٹیمیں بھی تعینات تھیں۔
زائرین کی رہنمائی اور دیکھ بھال کے لیے۱۶ سینٹرز قائم کیے گئے جبکہ ترجمہ سروس کا خصوصی اہتمام کیا گیا، بچوں کی دیکھ بھال کے مراکز اور ڈیجیٹل قرآن کریم کی سہولت فراہم کی گئی۔
