وزیر اعظم مودی نے ہری چند ٹھاکر کو خراج عقیدت پیش کیا

نئی دہلی، 16 مارچ (یو این آئی) وزیر اعظم نریندر مودی نے پیر کے روز مغربی بنگال کے شمالی 24 پرگنہ میں منعقد متوا دھرم میلے کے عقیدت مندوں اور شرکاء کو مبارکباد دی۔ قابلِ ذکر ہے کہ یہ میلہ متوا دھرم کے بانی اور روحانی پیشوا ہری چند ٹھاکر کی جینتی کے موقع پر منعقد کیا جاتا ہے۔
وزیراعظم مودی نے سوشل میڈیا پلیٹ فارم ایکس پر اپنے پیغام میں اس مذہبی اجتماع میں شریک تمام افراد کو دلی مبارکباد اور نیک تمنائیں پیش کیں۔ یہ اجتماع متوا سماج کے ماننے والوں کے لیے خصوصاً مشرقی ہندوستان میں اہمیت رکھتا ہے۔ وزیر اعظم نے لکھا کہ ‘یہ خصوصی موقع پُورن برہم شری شری ہری چند ٹھاکر جی کی جینتی سے منسلک ہے۔ میں انہیں عقیدت کے ساتھ نمن کرتا ہوں’۔
وزیر اعظم نے سماجی مصلح کی وراثت کو یاد کرتے ہوئے کہا کہ ہری چند ٹھاکر کی تعلیمات لاکھوں لوگوں کو مسلسل متاثر کرتی ہیں اور سماجی انصاف اور روحانی عقیدت کے لیے رہنمائی کا ذریعہ بنی ہوئی ہیں۔ انہوں نے کہا کہ ‘ان کے خیالات اور تعلیمات بہت سے لوگوں کو طاقت اور امیدیں فراہم کرتی رہتی ہیں۔ انہوں نے وقار، مساوات اور بھکتی کے لیے ایک مضبوط تحریک شروع کی۔ انہوں نے نسلوں کو نیکی، ہم آہنگی اور اجتماعی ترقی کے راستے پر چلنے کی ترغیب دی۔ قابل ذکر ہے کہ شری ہری چند ٹھاکر نے متوا تحریک شروع کی تھی۔ اس تحریک نے سماجی مساوات، روحانی عقیدت اور محروم طبقات کی ترقی پر زور دیا۔
وزیراعظم مودی نے کہا کہ متوا سماج کی روایات ہندوستان کے متنوع روحانی اور سماجی تانے بانے میں اہم کردار ادا کرتی ہیں۔ انہوں نے کہا کہ ‘متوا ثقافت کی مالا مال اور زندہ روایات گہری روحانیطاقت اور مساوات کے لیے پختہ عزم کو ظاہر کرتی ہیں۔ یہ ہمارے ملک کے سماجی ڈھانچے کو مضبوط بناتی ہیں۔
وزیر اعظم نے اس برادری کی فلاح کے لیے مرکزی حکومت کی کوششوں کو بھی اجاگر کیا۔ انہوں نے کہا کہ ‘گزشتہ ایک دہائی کے دوران ہماری حکومت متوا برادری کی فلاح، بااختیار بنانے اور وقار کے تحفظ کے لیے پوری طرح سے وقف رہی ہے’۔