27 سال بعد اقتدار میں واپسی، بی جے پی کا دہلی کے لیے ’مربوط ترقی‘ کا روڈ میپ

سدھارتھ رائے نئی دہلی، 16 مارچ (یو این آئی) تقریباً تین دہائیوں کے بعد دہلی میں بی جے پی کی اقتدار میں واپسی کے ساتھ، وزیر اعلیٰ ریکھا گپتا کا کہنا ہے کہ حکومت کی توجہ ایک ایسے ماڈل پر ہے جسے وہ ’’مربوط ترقی‘‘ قرار دیتی ہیں،ایک ایسا ماڈل جو بنیادی ڈھانچے کی توسیع کو ماحولیاتی پائیداری اور سماجی خدمات سے جوڑتا ہے اس سوال کے جواب میں کہ آج کے طرزِ حکمرانی کے چیلنجز سابقہ حکومتوں کے مقابلے میں کتنے مختلف ہیں، گپتا نے کہا کہ ہر دور اپنی ترجیحات ساتھ لاتا ہے۔ انہوں نے کہا، ’’حکمرانی کے ہر دور کے اپنے چیلنجز اور ترجیحات ہوتی ہیں۔ شیلا دیکشت نے بڑے انفراسٹرکچر پروجیکٹس پر توجہ مرکوز کی تھی جنہوں نے دہلی کی سڑکوں اور ٹرانسپورٹ نیٹ ورک کو بدل دیا۔ ہمارا وژن وہ ہے جسے میں ’ترقی یافتہ دہلی کے لیے مربوط ترقی‘ کہتی ہوں۔‘‘
وزیر اعلیٰ کے مطابق، اس طریقہ کار کا مقصد یہ یقینی بنانا ہے کہ بنیادی ڈھانچے کی ترقی، ماحولیاتی خدشات اور عوامی خدمات ساتھ ساتھ آگے بڑھیں۔ گپتا نے کہا، ’’اس کا مطلب یہ ہے کہ انفراسٹرکچر، ماحولیاتی پائیداری اور سماجی خدمات میں یکساں اضافہ ہو۔ مثال کے طور پر، ہم بیک وقت پبلک ٹرانسپورٹ کو برقی بنانے، چارجنگ انفراسٹرکچر کو پھیلانے، پانی کی فراہمی کے انتظام کو بہتر بنانے اور صحت کی دیکھ بھال کے نظام کو اپ گریڈ کرنے پر کام کر رہے ہیں۔‘‘
انہوں نے مزید کہا کہ حکومت یہ یقینی بنانے کی بھی کوشش کر رہی ہے کہ ترقی چند علاقوں تک محدود رہنے کے بجائے شہر کے تمام حصوں تک پہنچے۔ انہوں نے بتایا، ’’ہم نے ٹارگٹڈ ترقیاتی اقدامات بھی متعارف کرائے ہیں تاکہ یہ یقینی بنایا جا سکے کہ ترقی صرف مخصوص علاقوں میں مرتکز نہ ہو۔ حال ہی میں، حکومت نے ہر اسمبلی حلقے کے لیے ایک خصوصی ترقیاتی بجٹ کا اعلان کیا ہے تاکہ مقامی انفراسٹرکچر کی ضروریات کو زیادہ مؤثر طریقے سے حل کیا جا سکے۔ ہم نے ٹرانس یمنا اور دیہی ترقیاتی بورڈز کو بھی بحال کر دیا ہے۔‘‘
محترمہ گپتا نے کہا کہ ماحولیاتی پائیداری اس ماڈل کا ایک اور اہم جزو ہے۔
’’اسی کے ساتھ، ماحولیاتی پائیداری ہمارے ماڈل کا مرکزی حصہ ہے۔ سرکاری عمارتوں پر روف ٹاپ سولر (شمسی توانائی) کی تنصیب سے لے کر بڑے پیمانے پر ای وی (الیکٹرک گاڑیوں) کو اپنانے تک کے منصوبے اسی حکمت عملی کا حصہ ہیں۔ ہمارا مقصد ایک ایسا شہر بنانا ہے جہاں ترقی متوازن، پائیدار اور ہمہ گیر ہو۔‘‘