انڈگو نے دسمبر کے بعد 246 پائلٹ بھرتی کیے، متاثرہ مسافروں کو 164 کروڑ کے کوپن دیے

نئی دہلی، 16 مارچ (یواین آئی) بڑی ایئر لائن کمپنی انڈگو نے دسمبر کے پہلے ہفتے میں آپریشن میں بڑے پیمانے پر خلل پڑنے کے بعد 246 نئے پائلٹوں کو بھرتی کیا ہے اور متاثرہ مسافروں کو ہرجانے کے علاوہ 163.92 کروڑ روپے کے سفری کوپن تقسیم کیے ہیں۔
شہری ہوابازی کے وزیر کنجرپو رام موہن نائیڈو نے پیر کو راجیہ سبھا میں سوال و جواب کے دوران دسمبر کی اس واقعہ کے لیے مکمل طور پر ایئر لائن کو ذمہ دار ٹھہراتے ہوئے کہا کہ اس طرح کے واقعات کی تکرار روکنے کے لیے حکومت تمام اقدامات کر رہی ہے۔
انہوں نے کہاکہ "ایئر لائن کمپنی کو اپنے اندرونی آپریشن کا جائزہ لینا چاہئے تھا اور یہ سمجھنا چاہئے تھا کہ اگر ایف ڈی ٹی ایل (کا نیا ضابطہ) آرہا ہے تو ہمیں کتنے مزید پائلٹوں کی ضرورت ہوگی۔ ہم (نئے ضابطوں کو) نافذ کرنے سے پہلے ان کے ساتھ تقریباً روزانہ بات کر رہے تھے۔”
ایک ضمنی سوال کے جواب میں انہوں نے ایوان کو بتایا کہ انڈگو نے دسمبر کی اس واقعہ کے بعد 246 نئے پائلٹ بھرتی کیے ہیں۔ اس کے علاوہ حکومت نے اس کی پروازوں کی تعداد میں بھی 10 فیصد کی کٹوتی کی ہے۔
وزیر نے بتایا کہ دسمبر کے پہلے ہفتے میں ہوئے خلل سے 3.64 لاکھ مسافر متاثر ہوئے تھے۔ ایئر لائن نے اب تک 43.81 کروڑ روپے کا ہرجانہ دیا ہے۔ اس کے علاوہ اس نے اپنی طرف سے متاثرہ مسافروں کو 10-10 ہزار روپے کے سفری کوپن جاری کرنے کا بھی اعلان کیا ہے۔ اس مد میں اب تک 163.92 کروڑ روپے کے کوپن دیے گئے ہیں۔
انہوں نے ایوان کو یقین دلایا کہ اس طرح کی واقعہ دوبارہ نہ ہو اس کے لیے تمام اقدامات کیے جا رہے ہیں۔