وزیر اعلیٰ کا فاتح ٹیم کو ۲کروڑ روپے اور سرکاری نوکریاں دینے کا اعلان
ویب ڈیسک
سرینگر؍۲۸ فروری
جموں وکشمیر کے لیفٹیننٹ گورنر منوج سنہا نے پہلی بار رانجی ٹرافی کا خطاب اپنے نام کرنے پر جموں وکشمیر کرکٹ ٹیم کو مبارکباد پیش کی۔
سنہا نے تمام نوجوانوں سے اپیل کی کہ وہ اس کامیابی کی چنگاری کو اپنی مستقبل کی روشنی بنائیں۔
لیفٹیننٹ گورنر نے جموں و کشمیر کی اس شاندار کامیابی پر ٹیم کو مبارکباد پیش کرتے ہوئے ایکس پر ایک پوسٹ میں کہا’’جموں و کشمیر کی تاریخ کا سنہرا ترین لمحہ آن پہنچا ہے، ہماری کرکٹ ٹیم کو رانجی ٹرافی اپنے نام کرتے دیکھ کر جذبات لفظوں سے ماورا ہوگئے ہیں‘‘۔
ایل جی نے کہا’’ہر اس باہمت کھلاڑی کا، جس نے اپنی انتھک محنت اور عزم سے تاریخ رقم کی، پوری یونین ٹریٹری کی جانب سے دل کی گہرائیوں سے شکریہ، آپ نے تاریخ کو امر کر دیا ہے، اس کو عزت اور فخر سے اپنائیں‘‘۔
ان کا پوسٹ میں کہنا ہے’’میں سال۲۰۱۹کے بعد وزیر اعظم نریندر مودی کی قیادت میں جموں و کشمیر میں شروع ہونے والے کھیلوں کے انقلاب پر شکر گذار ہوں‘‘۔
سنہا نے نوجوانوں سے اس کامیابی کی چنگاری کو اپنے مستقبل کی روشنی بنانے کی اپیل کی۔انہوں نے کہا’’تمام نوجوانوں سے اپیل ہے کہ وہ اس کامیابی کی چنگاری کو اپنے مستقبل کی روشنی بنائیں، مسلسل اور بے خوف محنت کریں، اس فتح کو بنیاد بنا کر غلبے کے نئے دور کا آغاز کریں، جموں و کشمیر کا نا قابل تسخیر مستقبل آپ ہی سے شروع ہوتا ہے۔‘‘
اس دوران جموں وکشمیر کے وزیر اعلیٰ عمر عبداللہ نے ہفتے کے روز رانجی ٹرافی میں تاریخی فتح پر جموں وکشمیر ٹیم کو مبارکباد دیتے ہوئے کرناٹک کو شکست دینے کے بعد کھلاڑیوں اور معاون عملے کے لئے۲کروڑ روپے نقد انعام کا اعلان کر دیا۔
وزیر اعلیٰ نے کہا کہ اس یاد گار جیت نے پورے خطے کو فخر اور حوصلے سے سر شار کر دیا۔
واضح رہے کہ جموں وکشمیر نے ہفتے کو کرناٹک کے ہبی میں کھیلے گئے رانجی ٹرافی فائنل میں آٹھ بار چمپئن رہنے والی کرناٹک کو شکست دے کر تاریخ رقم کی۔
وزیر اعلیٰ نے ٹیم کو مبارکباد دیتے ہوئے کھلاڑیوں اور معاون عملے کے لئے۲کروڑ روپے نقد انعام کا اعلان کیا۔
وزیر اعلیٰ کے دفتر کے ایکس ہینڈل پر ایک پوسٹ میں کہا گیا’’رانجی ٹرافی میں ٹیم جموں و کشمیر کو ان کی تاریخی فتح پر مبارکباد دیتے ہوئے، وزیر اعلیٰ نے کرناٹک کے خلاف ان کے ہوم ٹرف پر زبردست جیت کے بعد کھلاڑیوں اور معاون عملے کیلئے۲کروڑ روپے کے نقد انعام کا اعلان کیا‘‘۔
اس جیت کو جموں و کشمیر کرکٹ کے لیے ایک اہم لمحہ قرار دیتے ہوئے،انہوں نے کہا کہ اس تاریخی جیت نے پورے خطے کو فخر اور حوصلے سے سرشار کر دیا۔
ان کا کہنا ہے’’ نمایاں کاکردگی دکھانے والے کھلاڑیوں کے لئے حال ہی میں جاری کردہ قواعد کے تحت سرکاری ملازمتوں کا بھی حق حاصل ہوگا۔‘‘
