جموں؍۲۸فروری
جموں ڈویژن میں پارسل خدمات کو زیادہ مؤثر، شفاف اور صارف دوست بنانے کے لیے ریلوے بورڈ نے مخصوص اسٹیشنوں اور نامزد مقامات پر ٹرانس شپمنٹ کی اجازت دے دی ہے۔ یہ سہولت وقف شدہ پارسل ٹرینوں اور لیز پر چلنے والی پارسل ویگنز دونوں پر لاگو ہوگی، ایک سرکاری ترجمان نے ہفتہ کو بتایا۔
نارتھ ریلوے کے جموں ڈویژن کے ترجمان کے مطابق اس اقدام سے پارسل کو اپنی منزل تک پہنچنے میں لگنے والا وقت کم ہوگا، جس سے تاجروں کو تیز تر ترسیل یقینی بنائی جا سکے گی۔
قبل ازیں ایک ٹرین سے دوسری ٹرین میں پارسل منتقل کرنے اور دوبارہ لوڈ کرنے کی اجازت نہیں تھی، جس کے باعث تاجروں کو مشکلات کا سامنا تھا اور پارسل آمدنی بھی متاثر ہو رہی تھی۔
حکام نے بتایا کہ ریلوے بورڈ کی جانب سے جاری نئی رہنما ہدایات خاص طور پر خراب ہونے والی اشیاء اور وقت کی پابندی والے سامان کے لیے مفید ثابت ہوں گی۔
ایک عہدیدار نے کہا’یہ پالیسی چھوٹے اسٹیشنوں پر بھی ٹرانس شپمنٹ کی اجازت دیتی ہے، جس سے ریل ٹرانسپورٹ سڑک کے مقابلے میں کم خرچ متبادل بن سکتی ہے‘۔
اس پیش رفت پر بات کرتے ہوئے سینئر ڈویژنل کمرشل منیجر، اوچت سنگھل نے کہا کہ ریلوے کا بنیادی ہدف پارسل لاجسٹکس میں ٹرانزٹ وقت کو کم کرنا ہے۔
انہوں نے کہا کہ پہلے براہِ راست رابطے کی کمی کے باعث پارسل میں تاخیر ہوتی تھی۔’’اب چونکہ مخصوص اسٹیشنوں پر ٹرانس شپمنٹ کی اجازت مل گئی ہے، ہم مختلف روٹس کو آپس میں جوڑ سکیں گے۔ اس سے نہ صرف ریلوے کی آپریشنل کارکردگی بڑھے گی بلکہ چھوٹے تاجروں اور ای-کامرس کمپنیوں کو بھی اپنے سامان کی محفوظ اور تیز تر ترسیل میں مدد ملے گی۔‘‘
