آپریشن سندور ابھی مکمل طور پر ختم نہیں ہوا:راج ناتھ سنگھ

جے پور: وزیرِ دفاع راج ناتھ سنگھ نے جمعرات کو کہا کہ آپریشن سندور ابھی پوری طرح ختم نہیں ہوا ہے، اور دہشت گردی کو جنم دینے والی سوچ کے خاتمے تک بھارت کی امن کی کوششیں جاری رہیں گی۔
جے پور کے ایس ایم ایس اسٹیڈیم میں منعقدہ شوریہ سندھیہ پروگرام سے خطاب کرتے ہوئے وزیرِ دفاع نے کہا’’آپریشن سندور کے ذریعے بھارت نے نہ صرف اپنی عسکری قوت کا مظاہرہ کیا ہے بلکہ اپنے قومی کردار کو بھی نمایاں کیا ہے‘‘۔
سنگھ نے وضاحت کی کہ آپریشن سندور کے دوران دہشت گردوں کے خلاف کی گئی کارروائیاں مکمل احتیاط، ذمہ داری اور انسانی اقدار کو مدنظر رکھتے ہوئے انجام دی گئیں۔
وزیر دفاع’’اسی وجہ سے آپریشن سندور بھارت کی تاریخ میں محض ایک فوجی کارروائی کے طور پر نہیں بلکہ جرات اور توازن کی علامت کے طور پر یاد رکھا جائے گا‘‘۔
سنگھ نے آپریشن کے دوران مسلح افواج کی جانب سے دکھائی گئی بہادری پر انہیں مبارکباد دی اور اس بات کا اعادہ کیا کہ جب تک دہشت گردی کا نظریہ باقی ہے، یہ آپریشن جاری رہے گا۔
وزیر دفاع نے کہا’’آپریشن سندور ابھی مکمل طور پر اختتام پذیر نہیں ہوا ہے۔ جب تک دہشت گردی کو فروغ دینے والی سوچ موجود ہے، امن کے لیے ہماری کوششیں جاری رہیں گی۔‘‘