پٹواری۱۰ہزار روپے رشوت لیتے ہوئے گرفتار:اے سی بی

سری نگر: جموں و کشمیر اینٹی کرپشن بیورو نے سنیچر کے روز بڈگام میں ایک کارروائی کے دوران حلقہ رکھ سوتھو کے پٹواری ریاض احمد خان کو۱۰ہزار روپے کی رشوت لیتے ہوئے رنگے ہاتھوں گرفتار کر لیا۔
اے سی بی کے مطابق بیورو کو ایک تحریری شکایت موصول ہوئی تھی جس میں شکایت گزار نے بتایا کہ اس نے اپنی جائیداد سے متعلق ضروری کاغذات کے حصول کی خاطر محکمہ مال کے حکام سے رابطہ کیا تھا۔ تاہم، متعلقہ پٹواری ریاض احمد خان نے فائل کو آگے بڑھانے کے بدلے۱۰ہزار سے۳۰ہزار روپے تک رشوت کا مطالبہ کیا۔
شکایت گزار نے واضح کیا کہ وہ بدعنوانی کے سخت خلاف ہے ، لہٰذا اس نے معاملہ اے سی بی سرینگر کے سامنے رکھا۔ شکایت موصول ہوتے ہی بیورو نے خفیہ جانچ کی جس میں پٹواری کی طرف سے رشوت طلب کرنے کی بات کی تصدیق ہوگئی۔
بعد ازاں اے سی بی سرینگر پولیس اسٹیشن میں ایف آئی آر نمبر۰۲ /۲۰۲۶زیر دفعہ۷پی سی ایکٹ۱۹۸۸درج کی گئی اور باضابطہ تحقیقات شروع کی گئیں۔
جیسے ہی ثبوت مکمل ہوئے ، ایک خصوصی ٹریپ ٹیم تشکیل دی گئی جس نے کارروائی کرتے ہوئے ریاض احمد خان کو۱۰ہزار روپے رشوت وصول کرتے ہوئے رنگے ہاتھوں دھر لیا۔
اے سی بی نے بتایا کہ کیس کی مزید تفتیش جاری ہے اور مزید انکشافات متوقع ہیں۔