محبوبہ کا وزیرِ اعلیٰ سے مختلف ریاستوں میں وزارتی ٹیم بھیجنے کا مطالبہ

سرینگر/۲۶ دسمبر
پیپلز ڈیموکریٹک پارٹی (پی ڈی پی) کی صدر محبوبہ مفتی نے جمعہ کے روز کہا کہ ملک میں عدم برداشت میں اضافہ ہو رہا ہے اور حالیہ ہراسانی کے واقعات کے تناظر میں جموں و کشمیر کے وزیرِ اعلیٰ سے اپیل کی کہ وہ مختلف ریاستوں میں کشمیریوں کی سلامتی کو یقینی بنانے کیلئے ایک وزارتی ٹیم روانہ کریں۔
محبوبہ نے یہاں نامہ نگاروں سے بات کرتے ہوئے اتراکھنڈ میں ایک کشمیری تاجر پر حملے کا حوالہ دیتے ہوئے کہا کہ انہوں نے اتراکھنڈ کے ڈی جی پی کو اس سلسلہ میں ان کی طرف سے ایکس پر جاری ایک پوسٹ کو ٹیگ کرتے ہوئے اس معاملے میں مداخلت کی درخواست کی۔
پی ڈی پی کی صدر نے کہا’’اسی وجہ سے ملزمان کو گرفتار کیا گیا۔ پولیس میں اب بھی کچھ افسران ایسے ہیں جو فوری ردعمل دیتے ہیں۔ لیکن ۷۲ گھنٹوں کے اندر تین واقعات؟ اتراکھنڈ، ہماچل پردیش اور ہریانہ میں۔ جو کچھ ہو رہا ہے وہ نہایت تشویشناک ہے‘‘۔
محبوبہ نے جموں کشمیر کے وزیرِ اعلیٰ عمر عبداللہ سے اپیل کی کہ وہ ایک وزارتی ٹیم تشکیل دے کر مختلف ریاستوں میں روانہ کریں تاکہ وہاں مقیم کشمیریوں کی سلامتی کو یقینی بنایا جا سکے۔
سابق وزیر اعلیٰ نے کہا’’ہماری حکومت کو ہر ریاست میں، اور بالخصوص اتراکھنڈ، ہماچل پردیش اور ہریانہ میں، جہاں اس طرح کے زیادہ تر واقعات پیش آتے ہیں، ایک وزارتی ٹیم بھیجنی چاہیے۔ندائے مشرق خبر‘‘