میر واعظ عمر فاروق ’ایکس‘ پر اب حریت کے چیئرمین نہیں رہے

سرینگر/۲۶ دسمبر
میر واعظ کشمیر میر واعظ عمر فاروق نے اپنے تصدیق شدہ ’ایکس‘ پروفائل سے ’چیئرمین آل پارٹیز حریت کانفرنس‘کی شناخت ہٹادی ہے ۔
میر واعظ، جو وادی کے مقتدر عالم دین ہیں، کے تصدیق شدہ ’ایکس‘ہینڈل پر دو لاکھ سے زیادہ فالورز ہیں۔ ترمیم کے بعد ان کے بائیو میں اب ان کے نام اور مقام کی بنیادی تفصیل درج ہے ۔
میر واعظ کا الزام ہے کہ انہیں حکام کی جانب سے حریت چیئرمین کی حیثیت سے اپنے ایکس ہینڈل میں تبدیلی کرنے کیلئے زور دیا جارہا تھا۔
عمرفاروق نے جمعہ کی صبح ’ایکس‘پر اپنے ایک وضاحتی پوسٹ میں کہا’’کچھ عرصے سے مجھے حکام کی جانب سے زور دیا جا رہا تھا کہ میں اپنے ایکس (سابقہ ٹویٹر) پر حریت چیئرمین کی شناخت ہٹادوں کیونکہ حریت کانفرنس کے تمام حلقوں بشمول عوامی ایکسن کمیٹی (اے اے سی) جس میں میں قیادت کر رہا ہوں، پر یو اے پی اے کے تحت پابندی عائد کی گئی ہے جس کے باعث حریت ایک ممنوعہ تنظیم بن گئی ہے ، بصورت دیگر میرا ہینڈل بند کیا جائے گا‘‘۔
ان کا پوسٹ میں مزید کہنا تھا’’ایسے وقت میں جب عوامی جگہ اور اظہار خیال کے ذرائع محدود کر دئے گئے ہیں، یہ پلیٹ فارم ان چند ذرائع میں سے ایک ہے جس کے ذریعے میں اپنے لوگوں تک پہنچ سکتا ہوں اور اپنے مسائل اور خیالات ان تک اور بیرونی دنیا تک پہنچا سکتا ہوں، ایسے حالات میں میرے پاس ایک مشکل انتخاب (ہوبسنز چوائس) کے سوا کوئی دوسرا چارہ نہیں تھا‘‘۔
واضح رہے کہ میر واعظ کی سربراہی والی حریت کانفرنس سال ۲۰۱۹میں دفعہ۳۷۰کی تنسیخ کے بعد عملی طور پر غیر فعال رہی ہے ۔ بعد ازاں اس کی بیشترجزو تنظیوں پر مرکزی حکومت نے پابندی عائد کر دی جن میں میری واعظ کی قیادت والی عوامی ایکشن کمیٹی بھی شامل ہے ۔
گذشتہ۶برسوں کے دوران اس اتحاد کی جانب سے شاذ و نادر ہی سیاسی بیانات جاری کئے گئے ۔ میر واعظ عمر فاروق سال۱۹۹۳میں قائم ہونے والی حریت کانفرنس کے بانی چیئرمین تھے ۔ایجنسیز