رتلے ہائیڈل پروجیکٹ کے افسر کا بی جے پی ایم ایل اے پر مداخلت کا الزام، پروجیکٹ چھوڑنے کی دھمکی

جموں کشمیر کے ضلع کشتواڑ میں۸۵۰ میگاواٹ کے رتلے پن بجلی منصوبے سے وابستہ ایک سینئر افسر نے ایک مقامی بی جے پی ایم ایل اے پر تعمیراتی کاموں میں مداخلت کا الزام عائد کیا ہے اور خبردار کیا ہے کہ اگر اس طرح کی رکاوٹیں جاری رہیں تو کمپنی کو اس منصوبے سے دستبردار ہونا پڑ سکتا ہے۔
الزام کے حوالے سے تبصرہ حاصل کرنے کے لیے ایم ایل اے‘ شگن پریہار کو کی گئی متعدد فون کالز اور پیغامات کا کوئی جواب موصول نہیں ہوا۔
میگھا انجینئرنگ اینڈ انفراسٹرکچر لمیٹڈ (ایم ای آئی ایل) کے جوائنٹ چیف آپریٹنگ آفیسر ہرپال سنگھ نے کہا کہ کمپنی نے مشینری، مواد اور افرادی قوت میں بھاری سرمایہ کاری کی ہے اور اگر وہ اس منصوبے سے ہٹتی ہے تو اسے بھاری نقصانات کا سامنا کرنا پڑ سکتا ہے، جن میں این ایچ پی سی کو فراہم کی گئی بینک گارنٹیوں سے منسلک جرمانے بھی شامل ہیں۔
اس بات پر زور دیتے ہوئے کہ بھارت ایک جمہوری ملک ہے، افسر نے کہا کہ اس طرح کی رکاوٹوں کی کوئی گنجائش نہیں ہے اور اس بات کو بھی واضح کیا کہ کمپنی کا کردار سیکولر ہے اور وہ کسی بھی سیاسی جماعت کی نہ حمایت کرتی ہے اور نہ مخالفت۔
انہوں نے کہا کہ منصوبے کو سیاست سے پاک رکھا جانا چاہیے اور کمپنی کو بغیر کسی مداخلت کے کام کرنے دیا جانا چاہیے۔ افسر نے خبردار کیا کہ ۱۳۳ میٹر بلند ڈیم اور زیرِ زمین پاور ہاؤس کی تعمیر کے دوران رکاوٹیں اور ناجائز مطالبات اس کی سلامتی اور معیار کو متاثر کر سکتے ہیں۔
این ایچ پی سی لمیٹڈ، جو وزارتِ توانائی کے تحت بھارت کی سرکردہ پن بجلی کمپنی ہے، نے دریائے چناب پر دربشالہ گاؤں کے مقام پر رن آف دی ریور ہائیڈرو الیکٹرک منصوبے کے نفاذ کے لیے جموں و کشمیر اسٹیٹ پاور ڈیولپمنٹ کارپوریشن لمیٹڈ (جے کے ایس پی ڈی سی) کے ساتھ مشترکہ منصوبے کے طور پر رتلے ہائیڈرو الیکٹرک پاور کارپوریشن لمیٹڈ تشکیل دی ہے۔
یہ مشترکہ منصوبہ کمپنی یکم جون ۲۰۲۱ کو قائم کی گئی، جس میں این ایچ پی سی اور جے کے ایس پی ڈی سی کے حصص بالترتیب ۵۱ فیصد اور ۴۹ فیصد ہیں۔ تعمیراتی کام ایم ای آئی ایل انجام دے رہی ہے۔
سنگھ نے پی ٹی آئی کو بتایا’’ہم بی جے پی ایم ایل اے اور ان کے کارکنوں کی بلا جواز مداخلت سے سخت پریشان ہیں‘ہم چاہتے ہیں کہ بغیر کسی بیرونی دباؤ کے کام کیا جائے اور اس معاملے کو متعلقہ حکام کے سامنے اٹھایا گیا ہے‘‘۔
افسر نے دعویٰ کیا کہ۴دسمبر کو بعض سیاست دانوں اور ان کے مقامی حامیوں، جو نہ تو منصوبے کے ملازم ہیں اور نہ کارکن، نے پروجیکٹ افسران پر دباؤ ڈالنے اور دھمکیاں دینے کی کوشش کی تاکہ ناجائز مطالبات پورے کروائے جا سکیں، جن میں ٹھیکے دینے اور بڑے پیمانے پر بھرتیوں کا مطالبہ شامل تھا، حالانکہ اس وقت کوئی اسامیاں موجود نہیں تھیں۔
سنگھ نے کہا’’اسی دن کمپنی کے ہیومن ریسورس سربراہ پر دربشالہ کے قریب ڈیوٹی کے بعد کوارٹرز واپس جاتے ہوئے حملہ کیا گیا، جس سے عملے میں خوف و ہراس پھیل گیا۔ ہم نے یہ معاملہ ڈپٹی کمشنر کے نوٹس میں لایا اور انہوں نے فوری کارروائی کو یقینی بنایا، جس میں شناخت شدہ ملزمان کے خلاف پولیس کیس درج کرنا بھی شامل ہے‘‘۔
افسر کا ایک ویڈیو بیان، اس کے ساتھ ڈپٹی کمشنر کشتواڑ کے نام ایک خط، جس میں حملے کی تفصیلات اور ایک’نوٹس آف اپیل‘ شامل ہے، جس میں کارکنوں اور ملازمین سے اپیل کی گئی ہے کہ وہ کسی بھی مفاد پرست عناصر کے کہنے پر مزدور ہڑتال میں شامل نہ ہوں، سوشل میڈیا پر وائرل ہو چکا ہے۔
سنگھ نے کہا کہ کمپنی نے مجموعی طور پر۱۴۳۴؍ افراد کو روزگار فراہم کیا ہے، جن میں سے۹۶۰ کشتواڑ ضلع کے رہائشی ہیں، ۲۲۰ قریبی ضلع ڈوڈہ سے، ۲۴ رام بن سے اور ۲۱۵ جموں و کشمیر سے باہر کے ہیں۔
انہوں نے کہا کہ زیادہ تر کارکنوں کے پاس مطلوبہ مہارت نہیں تھی اور انہیں مختلف دباؤ، زور زبردستی اور بازو مروڑنے کی حکمتِ عملیوں کے تحت ایڈجسٹ کیا گیا۔ ستمبر میں ریجنل لیبر کمشنر، جموں، نے۳۰۰ زائد کارکنوں کی چھانٹی کی اجازت دی۔ کمپنی نے صرف۲۰۰ کارکنوں کو فارغ کیا اور اس بات کا تحریری وعدہ کیا کہ مستقبل میں ضرورت پڑنے پر انہیں ترجیح دی جائے گی۔ بعض کو ضرورت کے تحت دوبارہ شامل بھی کیا گیا ہے۔
سنگھ نے کہا کہ افسران یا کارکنوں کو دھمکانے کی کوئی بھی کوشش غیر جمہوری اور ناقابلِ قبول ہے۔ ’’مسلسل مداخلت کمپنی کو اس منصوبے سے دستبردار ہونے پر مجبور کر سکتی ہے، جس کے نتیجے میں این ایچ پی سی کو دی گئی بینک گارنٹیوں اور مشینری و مواد میں کی گئی بھاری سرمایہ کاری سمیت بڑے نقصانات ہوں گے‘‘۔
افسر نے کہا’’کمپنی مقامی لوگوں سے اپیل کرتی ہے کہ وہ ایسے مطالبات کے پیچھے نہ پڑیں جو پورے نہیں ہو سکتے اور امن و فرقہ وارانہ ہم آہنگی برقرار رکھیں‘‘۔ انہوں نے مزید کہا کہ کمپنی کے تحت کام کرنے والوں کو مرکزی حکومت کی جانب سے مقرر کردہ کم از کم اجرت، دن میں تین وقت کا مفت کھانا، ایمبولینس سہولت، حفاظتی انتظامات اور فوت ہونے والے کارکنوں کے اہل خانہ کو معاوضہ فراہم کیا جا رہا ہے۔انہوں نے کہا کہ کسی بھی یونین رکن نے کام بند کرنے کی حمایت نہیں کی ہے۔
مقامی برادری، ضلعی اور جموں و کشمیر انتظامیہ اور مرکزی حکومت سے تعاون کی اپیل کرتے ہوئے سنگھ نے لوگوں سے کہا کہ وہ ایسے مطالبات پر وقت ضائع نہ کریں جو پورے نہیں ہو سکتے اور منصوبے کو پٹڑی سے اترنے سے بچائیں