ٹرانسپورٹروں کا۱۵ دسمبر کو ہڑتال کا اعلان

جموں و کشمیر ٹرانسپورٹ ویلفیئر ایسوسی ایشن نے منگل کے روز اپنی ’طویل عرصے سے زیرِ التواء‘ مطالبات کے پیشِ نظر ۱۵دسمبر کو ایک روزہ علامتی ہڑتال کا اعلان کیا۔
سرینگر میں پریس کانفرنس سے خطاب کرتے ہوئے ایسوسی ایشن کے جنرل سیکریٹری شیخ محمد یوسف نے کہا کہ جموں اور کشمیر، دونوں ڈویڑنوں کے ٹرانسپورٹرز نے متفقہ طور پر بطور احتجاج اس ہڑتال کا فیصلہ کیا ہے۔
یوسف نے کہا کہ ٹرانسپورٹ سیکٹر حکومت کی جانب سے اہم مسائل کے حل میں ’ناکامی‘ کی وجہ سے ’تباہی کے دہانے پر‘ پہنچ چکا ہے۔
اِن مسائل میں ای بسوں کی بے ضابطہ نقل و حمل، فٹنس اور گرین ٹیکس میں بھاری اضافہ اور من مانی ای چالان شامل ہیں۔
یوسف نے کہا کہ ایسوسی ایشن ہڑتال کے بعد حکومت کو سات دن کی مہلت دے گی اور خبردار کیا کہ اگر مطالبات پورے نہ ہوئے تو ایک ’بڑا فیصلہ‘ لیا جائے گا۔