سوپور میں چوری کے دو الگ الگ معاملے حل‘۲ملزم گرفتار

سرینگر/ یکم دسمبر
سوپور پولیس نے چوری کے دو الگ الگ معاملات کو حل کرکے۲ملزموں کو گرفتار کیا ہے اور مال مسروقہ کو بھی بر آمد کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ سوپور پولیس نے پولیس اسٹیشن بومائی اور پولیس اسٹیشن سوپور میں درج چوری کے دو الگ الگ معاملات کو کامیابی سے حل کیا ہے اور ملزموں کو گرفتار اور مال مسروقہ بر آمد کیا ہے ۔
ترجمان نے کہا کہ پہلے واقعے میں پولیس اسٹیشن بومائی کو نتھی پورہ کے عبدالرشید میر نامی ایک شخص کی جانب سے ان کی دکان الفجر ڈیپارٹمنٹل اسٹور سے سامان کی چوری کے بارے میں شکایت موصول ہوئی۔
پولیس ترجمان نے کہا کہ اس سلسلے میں بی این ایس کی متعلقہ دفعات کے تحت ایک ایف آئی آر زیر نمبر۲۰۲۵/۶۰درج کیا گیا اور تحقیقات شروع کی گئی۔
ان کا کہنا ہے کہ تفتیش کے دوران متعدد مشتبہ افراد سے پوچھ گچھ کی گئی اور ۲۹نومبر۲۰۲۵کو ایک مشتبہ شخص غلام محمد لون ولد عبد الجبار لون ساکن یہامہ ہندوارہ کو پوچھ تاچھ کیلئے طلب کیا گیا۔
پولیس ترجمان نے بتایا کہ مذکورہ شخص نے جرم کا اعتراف کیا اور انکشاف کیا کہ اس نے مسروقہ مال نتھی پورہ میں دریا کے قریب ایک باغ میں چھپایا ہے ۔انہوں نے کہا کہ اس انکشاف کی بنیاد پر سوپور پولیس نے مسروقہ مال بر آمد کیا۔
پولیس ترجمان نے بتایا کہ دوسرے واقعے میں پولیس پوسٹ بس اسٹینڈ (پولیس اسٹیشن سوپور) کو غلام محمد کنجوال ساکن سر سید آباد کی طرف سے ان کی بیکری کی دکان سے نقدی رقم چوری ہونے کی شکایت موصول ہوئی۔
ترجمان نے کہا کہ فوری کارروائی کرتے ہوئے اس ضمن میں بی این ایس کی متعلقہ دفعات کے تحت ایک ایف آئی آر زیر نمبر۲۰۲۵/۲۶۸درج کیا گیا اور تحقیقات شروع کی گئی۔
ان کا کہنا ہے کہ جرم کے ارتکاب کے۱۲گھنٹوں کے اندر اندر شاکر صادق بٹ کا سراغ لگایا گیا اور اس کو ایس ڈی ایچ سوپور کے احاطے سے گرفتار کیا گیا۔
بیان میں کہا گیا کہ دوران پوچھ تاچھ اس نے جرم کا اعتراف کیا اور چوری شدہ نقدی رقم کی نشاندہی کی جس کو بعد میں بر آمد کیا گیا۔