بھاگلپور: خصوصی چیکنگ مہم کے تحت 840 بغیر ٹکٹ مسافر پکڑے گئے ، 5.75 لاکھ سے زائد جرمانہ وصول

بھاگلپور، 22 نومبر (یواین آئی) بہار میں مشرقی ریلوے کے مالدہ ڈویژن کی جانب سے صاحب گنج۔ بھاگلپور اور جمال پور۔ بھاگلپور ریل سیکشن پر چلائی گئی خصوصی ٹکٹ چیکنگ مہم کے دوران گزشتہ دو دنوں میں کل 840 بغیر ٹکٹ مسافروں کو پکڑا گیا ہے اور اس مہم کے تحت ان مسافروں سے کل 5,75,225 روپے کا جرمانہ وصول کیا گیا ہے ۔
مشرقی ریلوے کے پرنسپل چیف کمرشیل مینجر ڈاکٹر ادے شنکر جھا نے اطلاع دیتے ہوئے بتایا ہے کہ یہ خصوصی مہم بھاگلپور، صاحب گنج، پیرپینتی، کہلگا[؟]ں، سلطان گنج، ابھے پور اور جمال پور جیسے اہم اسٹیشنوں پر چلائی گئی۔ دو دنوں تک جاری اس مہم میںاپ اور ڈا[؟]ن دونوں سمتوں میں چلنے والی تمام ایکسپریس اور پیسنجر ٹرینوں میں وسیع پیمانے پر ٹکٹ جانچ کی گئی۔
مہم کی قیادت مالدہ کے اے سی ایم (کمرشیل) تاپس کمار وشواس نے کی۔ اس دوران علاقائی ریلوے افسران، اسٹیشن ڈائریکٹر، کمرشیل سپروائزر اور ٹکٹ انسپکٹرز کی ٹیموں نے مشترکہ طور پر کارروائی کی۔ پوری مہم میں ریلوے پروٹیکشن فورس نے اہم تعاون فراہم کیا۔
ڈاکٹر جھا کے مطابق اس مہم کا براہ راست اثر مالدہ ڈویژن کے مختلف ریلوے سیکشنوں میں دیکھا گیا ہے ، جہاں بغیر ٹکٹ سفر میں کمی درج کی گئی ہے اور اہم اسٹیشنوں کی آمدنی میں اضافہ ہوا ہے ۔
انہوں نے یہ بھی بتایا کہ اسٹیشنوں پر ٹکٹ کاونٹر کی بھیڑ کم کرنے کے لیے مسافروں کو خودکار ٹکٹ وینڈنگ مشینیں اور ریل ون موبائل ایپ کے ذریعے آن لائن ٹکٹ بکنگ کی سہولت فراہم کی گئی ہے ۔ ریلوے مسلسل مسافروں کو ان خدمات کے زیادہ استعمال کے لیے بیدار بھی کر رہا ہے ۔