راجوری سڑک حادثے میں۳۰؍افراد زخمی

جموں/۴نومبر
جموں کشمیر کے راجوری ضلع میں منگل کی صبح ایک بھیانک سڑک حادثے میں تقریباً ۳۰؍افراد زخمی ہو گئے ، جن میں متعدد اسکولی طلبہ بھی شامل ہیں۔
حادثہ اس وقت پیش آیا جب ایک منی بس تیز رفتار کے باعث ڈرائیور کے قابو سے باہر ہو کر سڑک پر الٹ گئی۔
پولیس کے مطابق یہ واقعہ منڈی،راجوری روڈ پر اس وقت پیش آیا جب مسافروں سے بھری منی بس ایک موڑ کاٹتے ہوئے پھسل گئی۔ حادثے کے فوراً بعد مقامی لوگ اور پولیس موقع پر پہنچے اور زخمیوں کو گورنمنٹ میڈیکل کالج راجوری منتقل کیا گیا، جہاں ابتدائی طبی امداد فراہم کی گئی۔
جی ایم سی راجوری کے ڈاکٹروں کے مطابق، دو شدید زخمی طلبہ کو نازک حالت میں جموں ریفر کیا گیا ہے ۔ اسپتال ذرائع نے بتایا کہ زیادہ تر زخمیوں کو سر، کندھے اور ٹانگوں پر چوٹیں آئی ہیں۔
حادثے کی اطلاع ملتے ہی ڈپٹی کمشنر، ڈی آئی جی اور ایس ایس پی راجوری سمیت کئی اعلیٰ سول و پولیس افسران اسپتال پہنچے اور علاج معالجے کے انتظامات کا جائزہ لیا۔ ڈپٹی کمشنر راجوری نے ہدایت دی کہ زخمیوں کو بہترین طبی سہولیات فراہم کی جائیں اور واقعے کی مکمل جانچ کی جائے ۔
ابتدائی تفتیش میں انکشاف ہوا ہے کہ منی بس میں مقررہ حد سے زیادہ مسافر سوار تھے اور گاڑی کی رفتار حد سے تجاوز کر گئی تھی، جس کے باعث ڈرائیور نے کنٹرول کھو دیا۔ پولیس نے اس سلسلے میں مقدمہ درج کرکے تحقیقات شروع کر دی ہے ۔
ایک ٹریفک افسر نے یو این آئی کو بتایا’’ڈرائیوروں کو خبردار کیا گیا ہے کہ اوورلوڈنگ یا تیز رفتاری کی صورت میں سخت کارروائی ہوگی۔ عوامی سلامتی کے لیے ہم زیرو ٹالرینس پالیسی پر عمل کر رہے ہیں‘‘۔
عوامی حلقوں نے انتظامیہ سے اپیل کی ہے کہ سڑکوں کی مرمت اور ٹریفک نگرانی کے نظام کو مزید مؤثر بنایا جائے تاکہ مستقبل میں ایسے افسوسناک واقعات سے بچا جا سکے ۔ایجنسیز