کہتے ہیں کہ محبت اور جنگ میں سب کچھ جائز ہے اورہم بھی اس میں یقین رکھتے ہیں… ہم تو سیاستدان نہیں ہیں اور ہاں عاشق بھی نہیں ‘ لیکن پھر بھی ہمیں اس بات پر یقین ہے اور … اور سو فیصد ہے ۔ یقین آنکھیں بند کرکے نہیں آیا ہے بلکہ ان آنکھوں سے جو کچھ ہم نے دیکھا ہے … محبت اور جنگ میں دیکھا ہے… اس سے ہمیں اس پر یقین آگیا ہے…اس وقت بہار میں جنگ(الیکشن) کی تیاریاں عروج پر ہیں اور… اور اس لئے سیاستدان بھی … ہول سیل میں سیاستدان بھی اس جنگ کی تیاریوں میں لگے ہو ئے ہیں اور… اور اس دوران وہ جو کچھ بھی کررہے ہیں… کہہ رہے ہیں، اسے جائز سمجھ رہے ہیں… وعدے ‘لوگوں سے جھوٹے وعدوں کو بھی جائزہ مانا جارہا ہے … انڈیا بلاک نے گھر گھر اور ہر گھر کو ایک سرکاری ملازمت فراہم کرنے کا وعدہ کیا اور… اور این ڈی اے نے ایک کروڑ سرکاری نوکریاں دینے کی بات اپنے انتخابی منشور میں کی ہے… وعدوں کے دوران انڈیا بلاک اور نہ این ڈی اے نے یہ سوچا کہ کیا ۱۳ کروڑ کی آبادی میں گھر گھر نوکری یا ایک کروڑ سرکاری نوکریاں دینے کی گنجائش ہے بھی یا نہیں … یا اتنی سرکاری اسامیاں خالی ہیں بھی…لیکن صاحب یہ جاننے کی ضرورت نہیں ہے… بالکل بھی نہیں ہے کہ دونوں گروپ جانتے ہیں کہ یہ وعدے ہی تو ہیں… الیکشن ختم ‘ساتھ ہی وعدے بھی ختم جیسے یم دیکھ رہے ہیں… جموں کشمیر میں دیکھ رہے ہیں… دودھ اور شہد کی نہروں کا وعدہ اور… اور آج ہر ایک وعدے پر’شرطیں لاگو ہیں‘ کی شرط لگائی جا رہی ہے… خیر واپس چلتے ہیں بہار جہاں ہم دیکھ رہے ہیں کہ… کہ انڈیا بلاک اور این ڈی اے ‘ جنگ… معاف کیجئے الیکشن جیتنے کیلئے کچھ بھی کر گزر رہے ہیں…اورا نہیں کرنے دیجئے کہ… کہ یہ سب کچھ جائز ہے… لیکن… لیکن صاحب ایک بات ہے … اور وہ یہ ہے کہ اتنے کچھ کرنے کے بعد بھی جیت دومیں سے ایک گروپ کی ہو گی اور… اور لکھ لیجئے … آج ہی لکھ لیجئے کہ جیت انڈیا بلاک کی نہیں ہو گی… بالکل بھی نہیں ہو گی … تیجسوی کی قسمت میں بہار کا وزیرا علیٰ بننا نہیں لکھا ہے… بالکل بھی نہیں لکھا ہے… اسی طرح جس طرح راہل بابا کی تقدیر میں ملک کا وزیر اعظم بننا نہیں لکھا ہے… بالکل بھی نہیں لکھا ہے… اور یہ بات بھی آپ آج ہی لکھ لیجئے … جلی حروف میں لکھ لیجئے ۔ ہے نا؟
محبت اور جنگ میں سب کچھ جائز
