بہار اسمبلی انتخابات کے دوسرے مرحلے کا نوٹیفکیشن جاری

نئی دہلی ، 13 اکتوبر (یو این آئی) الیکشن کمیشن نے بہار میں اسمبلی انتخابات کے دوسرے مرحلے کے لئے 122 نشستوں اور سات دیگر ریاستوں اور مرکز کے زیر انتظام علاقوں کی آٹھ نشستوں کے لئے پیر کو نوٹیفکیشن جاری کردیا ۔
پنجاب میں ترن تران ، راجستھان میں انتا ، اڈیشہ میں نوا پارا ، جھارکھنڈ میں گھاٹ شیلا ، تلنگانہ میں جوبلی ہلز ، میزورم میں ڈمپا اور مرکز کے زیر انتظام علاقے جموں و کشمیر میں ناگروٹا اور بڈگاؤں کی خالی نشستوں پر ضمنی انتخابات کے لیے بھی علیحدہ نوٹیفکیشن جاری کیے گئے ہیں۔
243 رکنی بہار اسمبلی کے انتخابات 6 نومبر اور 11 نومبر کو دو مراحل میں ہوں گے ۔ بہار میں دوسرے مرحلے کی ووٹنگ کے ساتھ ساتھ پنجاب ، راجستھان ، اڈیشہ ، جھارکھنڈ ، تلنگانہ ، میزورم اور جموں و کشمیر میں اسمبلی ضمنی انتخابات 11 نومبر کو ہوں گے ۔
ان تمام انتخابات کے ووٹوں کی گنتی 14 نومبر کو ہوگی ۔ نوٹیفکیشن جاری ہونے کے ساتھ ہی بہار میں دوسرے مرحلے کے انتخابات اور دیگر ریاستوں میں ضمنی انتخابات کے لیے امیدواروں کی نامزدگی کا عمل بھی آج سے شروع ہو جائے گا ۔