جنک پوری کی ہمہ جہت ترقی کے لیے حکومت پرعزم: سود

نئی دہلی، 10 اکتوبر (یو این آئی) دہلی کے وزیر تعلیم آشیش سود نے جمعہ کو جنک پوری میں سڑک کی تعمیر کے کام کا افتتاح کرنے کے بعد کہا کہ وہ اس بات کو یقینی بنانے کے لئے دہلی کی وزیر اعلیٰ ریکھا گپتا کے شکر گزار ہیں کہ انہوں نے مہاویر انکلیو، چانکیہ پلیس، دیال سر روڈ، اتم نگر اور جنک پوری اسمبلی حلقہ کے کئی دیگر علاقوں میں ترقیاتی کاموں میں کوئی کمی نہیں ہونے دی ۔
مسٹر سود نے کہا کہ وزیر اعلیٰ نے جنک پوری کی ترقی کے لیے نہ تو فنڈز کی کمی اور نہ ہی اس فنڈ کو عوام کے مفاد میں خرچ کرنے کی سیاسی خواہش کی کوئی کمی دکھائی ہے ۔ وزیراعلی نے دہلی کے دیگر علاقوں کی طرح جنک پوری اسمبلی حلقہ کو بھی ترجیح دی ہے ۔
انہوں نے کہا کہ جنک پوری میں آئندہ دنوں میں کئی ترقیاتی منصوبے شروع کیے جائیں گے ، جن میں سیوریج کی نئی پائپ لائنیں بچھانا، پرانی سیوریج پائپ لائنوں کی مرمت، پینے کے پانی کی نئی پائپ لائنیں بچھانا، موسم سرما اور گرمیوں کی استعداد کے مطابق بجلی کی تقسیم کا انتظام، سڑکوں کی مرمت یا جدید ٹیکنالوجی کا استعمال کرتے ہوئے نئی سڑکوں کی تعمیر اور اس طرح کے دیگر پروجیکٹوں کو ترجیحی بنیادوں پر مکمل کیا جائے گا۔
وزیر تعلیم نے کہا کہ جمعرات کو وزیر داخلہ امت شاہ نے دہلی میں کروڑوں روپے کے پروجیکٹوں کا افتتاح کیا اور آج اسی کے تسلسل میں جنک پوری میں کروڑوں روپے کی سڑکوں اور متعلقہ کاموں کا افتتاح کیا گیا۔