سپریم کورٹ میں آج ریاستی حیثیت سے متعلق درخواستوں کی سماعت

سرینگر/۹؍ اکتوبر
سپریم کورٹ جمعہ کو جموں کشمیر کی ریاستی حیثیت کی بحالی سے متعلق درخواستوں کی سماعت کرے گا۔
یہ درخواستیں چیف جسٹس آف انڈیا کی عدالت میں سیریل نمبر ۱۷ پر فہرست شدہ ہیں۔ وکیل صویب قریشی کے مطابق’’یہ کیس۱۰؍ اکتوبر کو چیف جسٹس آف انڈیا کی سربراہی میں بنچ کے سامنے سماعت کے لیے درج ہے‘‘۔انہوں نے بتایا کہ ابھی تک یونین آف انڈیا نے اس معاملے پر کوئی جواب دائر نہیں کیا ہے۔
۱۴؍ اگست کو جموں و کشمیر کی ریاستی حیثیت کی بحالی سے متعلق درخواست کی سماعت کے دوران سپریم کورٹ نے کہا تھا کہ زمین پر حقیقی صورتحال کو مدنظر رکھا جانا چاہیے اور پہلگام حملے جیسے واقعات کو نظر انداز نہیں کیا جا سکتا۔
چیف جسٹس آف انڈیا بی آر گاوئی اور جسٹس کے ونود چندرن پر مشتمل بنچ نے کہا’’آپ کو زمینی حقائق کو بھی مدنظر رکھنا ہوگا آپ پہلگام میں جو ہوا اسے نظر انداز نہیں کر سکتے‘‘۔
درخواست گزاروں نے موقف اختیار کیا کہ ریاستی حیثیت کی بحالی میں تاخیر وفاقیت کے اصول کی خلاف ورزی ہے، جو آئین کے بنیادی ڈھانچے کا حصہ ہے۔انہوں نے یہ بھی کہا کہ دسمبر ۲۰۲۳ کی سپریم کورٹ کی ہدایت کے مطابق ‘ریاستی حیثیت کی بحالی جلد از جلد عمل میں لائی جائے’ کیلئے کوئی واضح ٹائم لائن یا اقدامات نہیں کیے گئے ہیں۔مشرق خبر
۔۔۔۔۔۔۔۔