مرکزی حکومت کی متاثرہ کسانوں کیلئے بروقت امداد

گزشتہ چند ہفتوں کے دوران جموں و کشمیر نے قدرتی آفات کی ایک کڑی آزمائش دیکھی۔ موسلا دھار بارشوں، اچانک آنے والے سیلاب اور زمین کھسکنے کے واقعات نے یو ٹی کے کئی علاقوں کو بری طرح متاثر کیا۔ کھیت کھلیان تباہ ہوئے، فصلیں بہہ گئیں، مویشی ہلاک ہوئے، اور ہزاروں خاندان اپنے مکانات سے محروم ہوگئے۔ خاص طور پر جموں ڈویڑن کے دیہی علاقے ‘جہاں زراعت ہی روزگار اور زندگی کا بنیادی سہارا ہے ‘سب سے زیادہ متاثر ہوئے۔ ایسے وقت میں مرکزی حکومت کی طرف سے کسانوں اور عام شہریوں کے لیے اعلان کردہ امدادی پیکیج نہ صرف مالی مدد کا اعلان ہے بلکہ یہ ایک اخلاقی اور انسانی وابستگی کا اظہار بھی ہے۔
مرکزی وزیر برائے زراعت و کسان بہبود شیو راج سنگھ چوہان نے ۷؍ اکتوبر کو ویڈیو کانفرنسنگ کے ذریعے جموں و کشمیر کے۵ء۸ لاکھ کسانوں کے لیے پی ایم کسان اسکیم کی ۲۱ویں قسط کے تحت ۱۷۱ کروڑ روپے براہِ راست ان کے بینک کھاتوں میں منتقل کیے۔ ساتھ ہی، انہوں نے سیلاب، بارش اور زمین کھسلنے کے واقعات سے متاثرہ پانچ ہزار سے زائد مکانات کی دوبارہ تعمیر کے لیے ۶۲ء۸۵ کروڑ روپے کے خصوصی پیکیج کا اعلان کیا۔ اس کے علاوہ، متاثرہ علاقوں کے مزدوروں کے لیے منریگا کے تحت ۵۰؍اضافی کام کے دن فراہم کیے گئے، تاکہ وہ اپنی معاشی سرگرمیاں دوبارہ شروع کر سکیں۔
یہ فیصلے اس حقیقت کو اجاگر کرتے ہیں کہ مرکزی حکومت نہ صرف پالیسی سطح پر بلکہ زمینی حقیقت کے مطابق بھی عوام کے شانہ بشانہ کھڑی ہے۔ وزیر اعظم نریندر مودی کی قیادت میں حکومت نے یہ واضح پیغام دیا ہے کہ جموں و کشمیر کا ہر کسان، ہر مزدور، اور ہر گھرانہ اس ملک کے اجتماعی دل کی دھڑکن کا حصہ ہے۔
یہ بات کسی سے پوشیدہ نہیں کہ جموں و کشمیر کی معیشت بڑی حد تک زراعت پر منحصر ہے۔ زعفران، سیب، اخروٹ، چاول، سبزیاں اور دیگر فصلیں یہاں کے دیہی خاندانوں کی ریڑھ کی ہڈی ہیں۔ مگر حالیہ بارشوں اور سیلاب نے ہزاروں ایکڑ زمین کو نقصان پہنچایا۔ مٹی کی زرخیزی متاثر ہوئی، پودے اکھڑ گئے، اور کئی کسانوں کی سال بھر کی محنت پلک جھپکتے میں ضائع ہو گئی۔
ایسے حالات میں مرکزی حکومت کا یہ بروقت اقدام کسانوں کے لیے سانس لینے کا موقع ہے۔ کسانوں کے لیے مالی امداد کی براہِ راست منتقلی اس لحاظ سے بھی قابلِ ستائش ہے کہ اس سے شفافیت، تیزی اور ذمہ داری یقینی ہوتی ہے۔ بیچ میں کوئی درمیانی رکاوٹ نہیں، کوئی کاغذی پیچیدگی نہیں ‘ سیدھی مدد، سیدھا فائدہ۔
مرکزی حکومت نے متاثرہ کسانوں کو نہ صرف نقد امداد فراہم کی بلکہ زرعی زمینوں کی بحالی کے لیے این ڈی آر ایف اور ایس ڈی آر ایف کے تحت خصوصی منصوبوں پر بھی غور شروع کر دیا ہے۔ یہ اقدام مٹی کی صفائی، سِلٹ ہٹانے، اور زمین کی زرخیزی بحال کرنے کے لیے ایک جامع منصوبہ بندی کا حصہ ہے۔ ایسے عملی اقدامات یہ ظاہر کرتے ہیں کہ حکومت محض اعلانات تک محدود نہیں بلکہ عملی زمین پر موجود ہے۔
جموں و کشمیر کے لیفٹیننٹ گورنر منوج سنہا نے بھی مرکز کے اس اقدام کو بھرپور انداز میں سراہا ہے۔ انہوں نے وزیر اعظم نریندر مودی اور وزیر زراعت شیو راج سنگھ چوہان کا شکریہ ادا کرتے ہوئے کہا کہ یہ ریلیف پیکیج متاثرہ کسانوں اور مزدوروں کے لیے نئی اْمید کا چراغ ثابت ہوگا۔
سنہا نے امید ظاہر کی کہ اس مالی مدد کے نتیجے میں کسان جلد اپنی زراعتی سرگرمیاں دوبارہ شروع کر سکیں گے۔ ان کا یہ بیان نہ صرف شکرگزاری کا مظہر ہے بلکہ ایک سیاسی ہم آہنگی اور عملی اشتراک کی علامت بھی ہے۔
منریگا کے تحت کام کے دنوں میں ۱۰۰ سے بڑھا کر ۱۵۰ دن کرنے کا فیصلہ بظاہر ایک انتظامی اعلان لگتا ہے، مگر اس کے اثرات بہت گہرے ہیں۔ متاثرہ علاقوں میں جہاں زمینیں سیلاب سے برباد ہو گئی ہیں، یہ اسکیم لوگوں کو دوبارہ کام پر واپس لانے میں کلیدی کردار ادا کرے گی۔ یہ روزگار ہی نہیں بلکہ عزتِ نفس کی بحالی کا بھی ذریعہ ہے۔
یہ اقدام اْن دیہی مزدوروں کے لیے زندگی کی نئی اْمید ہے جن کے پاس اب کھیتی کے لیے زمین نہیں بچی۔ انہیں اپنے ہی گاؤں میں کام ملے گا، آمدنی ہوگی، اور وہ اپنی زندگی دوبارہ سنوار سکیں گے۔
پردھان منتری فصل بیمہ یوجنا کا فعال ہونا جموں و کشمیر کے کسانوں کے لیے ایک اور مضبوط سہارا ہے۔ حکومت کی ہدایت پر ریاستی انتظامیہ اور بیمہ کمپنیاں نقصان کے جائزے کے عمل کو تیز کر رہی ہیں تاکہ متاثرہ کسانوں کو جلد از جلد معاوضہ مل سکے۔ اس سے کسانوں کو فوری مالی سہارا ملے گا اور ان کا اعتماد بحال ہوگا۔
یہ اسکیم ایک ایسے وقت میں کارگر ثابت ہو رہی ہے جب موسمی تبدیلیوں نے زراعت کو غیر یقینی بنا دیا ہے۔ بارش، خشک سالی یا ڑالہ باری …ہر خطرہ کسان کے لیے تباہ کن ثابت ہو سکتا ہے۔ مگر فصل بیمہ اسکیم اس خطرے کے خلاف حکومتی ڈھال کے طور پر سامنے آئی ہے۔
اس فیصلے کا ایک بڑا پہلو یہ بھی ہے کہ یہ مرکز اور جموں و کشمیر کے درمیان بڑھتے ہوئے باہمی اعتماد کو مزید مضبوط کرتا ہے۔ ماضی میں جب کبھی قدرتی آفت آئی، تو اکثر شکایات سننے کو ملیں کہ امداد سست یا ناکافی تھی۔ مگر اس بار حکومت کی تیز رفتار کارروائی، براہِ راست امداد کی ترسیل، اور مستقل فالو اپ ایک نئے طرزِ حکمرانی کا ثبوت ہے۔
یہ اقدام صرف ریلیف نہیں بلکہ ریاستی یکجہتی کا عملی مظہر ہے۔ یہ بتاتا ہے کہ نئی دہلی کے لیے جموں و کشمیر صرف ایک جغرافیائی خطہ نہیں، بلکہ ایک احساس، ایک عزم، اور ایک اجتماعی ذمہ داری ہے۔
لیفٹیننٹ گورنر منوج سنہا کی تعریف اور وزیر اعظم نریندر مودی و وزیر زراعت شیو راج سنگھ چوہان کا عزم‘ سب مل کر ایک ایسے وڑن کی تشکیل کر رہے ہیں جو جموں و کشمیر کے کسانوں کے لیے روشنی کا مینار بن سکتا ہے۔یہی وہ طرزِ حکمرانی ہے جس سے ملک کے ہر کسان، مزدور اور شہری کو یہ احساس ہوتا ہے کہ وہ اکیلا نہیں’ اس کے پیچھے ایک مضبوط مرکز کھڑا ہے۔