’این سی راجیہ سبھا کی تین نشستیں جیتنے کی پوزیشن میں ہے‘

سرینگر/۴؍اکتوبر
نیشنل کانفرنس کے ترجمان اعلیٰ تنویر صادق نے ہفتے کو کہا کہ پارٹی جموں و کشمیر سے راجیہ سبھا کے آئندہ انتخابات میں ایک مضبوط پوزیشن میں ہے اور اسے چار میں سے تین نشستیں جیتنے کا پورا یقین ہے ۔
سرینگر میں نامہ نگاروں سے بات چیت کے دوران تنویر صادق نے کہا کہ پارٹی قیادت آئندہ دنوں میں اس بات کا حتمی فیصلہ کرے گی کہ نیشنل کانفرنس تین یا چاروں نشستوں پر امیدوار کھڑا کرے گی۔ انہوں نے کہا’’نیشنل کانفرنس راجیہ سبھا انتخابات میں تین نشستیں جیتنے کی پوزیشن میں ہے ۔ تاہم یہ فیصلہ کہ ہم چاروں نشستوں پر لڑیں گے یا نہیں، قیادت مشاورت کے بعد لے گی‘‘۔
صادق نے کہا کہ پارٹی کی داخلی جانچ پڑتال سے یہ بات واضح ہوئی ہے کہ موجودہ سیاسی منظرنامے میں نیشنل کانفرنس کے پاس عددی برتری ہے ۔ ہم نے اپنا ہوم ورک مکمل کر لیا ہے اور ہم پر اعتماد ہیں کہ نتیجہ ہمارے حق میں آئے گا۔
کانگریس کے ساتھ ممکنہ تال میل کے سوال پر تنویر صادق نے کہا کہ انڈیا بلاک کے تحت اتحادی جماعتوں کے مطالبات فطری ہیں، تاہم فیصلے صرف زمینی حقائق اور عددی طاقت کو مدنظر رکھ کر ہی لئے جائیں گے ۔ انہوں نے کہا’’ہم نے ماضی میں اتحادیوں کیلئے قربانیاں دی ہیں، لیکن اس بار فیصلہ احتیاط سے اور زمینی حقائق کی بنیاد پر ہوگا‘‘۔
صادق نے اس امر کی نشاندہی کی کہ چوتھی نشست کا نتیجہ سیاسی طور پر خاص اہمیت کا حامل ہوگا کیونکہ یہ نہ صرف اپوزیشن بلاک کے اندر اتحاد کی سطح کو ظاہر کرے گا بلکہ ابھرتے ہوئے سیاسی معاہدات کی سمت کو بھی واضح کرے گا۔
این سی ترجمان نے کہا’’چوتھی نشست پر ووٹنگ سے ظاہر ہوگا کہ مختلف جماعتیں کس طرح اپنی پوزیشن طے کرتی ہیں۔ یہ ابھرتی ہوئی سیاسی مساوات کی سمت کا پتہ دے گا‘‘۔انہوں نے اشارہ دیا کہ انتخابات کے دوران وفاداریاں بدلنے یا خرید و فروخت کی کوششوں کو نظرانداز نہیں کیا جا سکتا، تاہم انہیں اپنے ارکان کی سالمیت اور پارٹی کی یکجہتی پر مکمل بھروسہ ہے ۔
صادق نے زور دیا کہ پارٹی قیادت، ڈاکٹر فاروق عبداللہ اور عمر عبداللہ کی سربراہی میں، موجودہ سیاسی منظرنامے اور اتحادی ڈائنامکس کو دیکھتے ہوئے مشاورت کے بعد فیصلہ کرے گی۔یو این آئی