سوپور میں دو اور ادھمپور میں ایک منشیات فروش گرفتار، ممنوعہ مواد بر آمد:پولیس

سرینگر/۱۵ستمبر
معاشرے سے منشیات کی بیخ کنی کیلئے مہم کو وسیع پیمانے پر جاری رکھتے ہوئے سوپور پولیس نے دو منشیات فروشوں کو گرفتار کرکے ان کی تحویل سے ممنوعہ مواد بر آمد کیا ہے ۔
ایک پولیس ترجمان نے اپنے ایک بیان میں بتایا کہ سوپور پولیس نے این ڈی پی ایس ایکٹ کے تحت درج شدہ مقدمات میں جاری تحقیقات کے دوران دو منشیات فروشوں کو گرفتار کیا ہے ۔
ترجمان نے کہا کہ منیر احمد ولد غلام نبی ساکن سنگرام پورہ بٹہ پور سوپور کو ایف آئی آر نمبر۱۷۲۰۲۵کے سلسلے میں گرفتار کیا گیا۔
پولیس ترجمان نے بتایا کہ اس کے انکشاف پر، کوڈین فاسفیٹ کی۱۴ بوتلیں برآمد کی گئیں جنہیں اس نے شلپورہ سوپور کے ایک قبرستان میں چھپا رکھا تھا۔
ترجمان نے کہا کہ محمد رفیق نجار ولد غلام محی الدین نجار ساکن گرین ٹاؤن سوپور کو ایف آئی آر زیر۲۰۲۵/۱۷۳ نمبر کے سلسلے میں منشیات اسمگلنگ میں اس کی سرگرم شمولیت پر گرفتار کیا گیا۔
ان کا کہنا ہے کہ دونوں گرفتاریاں سوپور میں ڈرگ سپلائی چین کے پس پردہ لنک کی تفتیش کے حصے کے طور پر عمل میں آئیں۔
بیان میں کہا گیا کہ برآمد شدہ ممنوعہ مواد کو ضبط کر لیا گیا ہے اور اضافی روابط کی شناخت اور وسیع نیٹ ورک کو ختم کرنے کے لیے مزید تفتیش جاری ہے ۔
ترجمان نے کہا کہ سوپور پولیس منشیات کی اسمگلنگ کے تئیں اپنی صفر رواداری کی پالیسی کا اعادہ کرتی ہے اور یقین دلاتی ہے کہ منشیات کی تجارت میں ملوث افراد کے خلاف سخت کارروائی جاری رہے گی۔
اس دوران پولیس نے ضلع اودھم پور میں ایک منشیات فروش کو گرفتار کرکے اس کی تحویل سے ہیروئن جیسا ممنوعہ مواد بر آمد کیا ہے ۔
ایک پولیس ترجمان نے اپنے ایک بیان میں کہا کہ پولیس اسٹیشن ریہام بل کی ایک پارٹی نے معمول کی گشت کے دوران ایک شخص جو مشکوک حالت میں گھوم رہا تھا، کو روکا۔
ترجمان نے کہا کہ تلاشی کے دوران اس کی تحویل سے پالی پوچ میں رکھا گیا ۳ء۴گرام ہیروئن جیسا ممنوعہ مواد بر آمد کیا گیا جس کے بعد ملزم کو بر سر موقع ہی گرفتار کیا گیا۔
ملزم کی شناخت جانم بھگت عرف جانی ولد موہن لال ساکن کمبل ڈانگا اودھم پور کے طور پر ہوئی ہے ۔
بیان میں کہا گیا کہ اس ضمن میں پولیس اسٹیشن ریہام بل میں این ڈی پی ایس ایکٹ کے تحت زیر ایف آئی آر نمبر۲۰۲۵/۱۳۹ایک مقدمہ درج کیا گیا اور مزید تحقیقات شروع کی گئی۔انہوں نے کہا کہ پولیس منیشات کی بیخ کنی کو یقینی بنانے کیلئے پر عزم ہے ۔