این سی بی کا منشیات اسمگلنگ کے بڑے نیٹ ورک کا پردہ فاش ‘۳گرفتار

سرینگر/۱۳ستمبر
نارکوٹکس کنٹرول بیورو (این سی بی) سرینگر زون نے جنوبی کشمیر میں منشیات کی اسمگلنگ کے ایک بڑے نیٹ ورک کا پردہ فاش کر کے ایک اہم سپلائر اور دو عادی مجرموں سمیت تین افراد کو گرفتار کیا ہے ۔
حکام نے بتایا کہ یہ آپریشن۱۹؍اگست کو ضلع اننت ناگ کے بجبہاڑہ علاقے میں مخصوص انٹیلی جنس معلومات کی بنیاد پر کیا گیا تھا۔
حکام نے کہا کہ اس آپریشن کے نتیجے میں تقریباً ۷۳۵ء۱۰کلو گرام چرس برآمد کیا گیا جو رواں سال کی سب سے بڑی ضبطی میں سے ایک ہے اور تین ملزموں کو گرفتار کیا گیا۔
گرفتار شدگان کی شناخت فردوس ساکن بجبہاڑہ، جان محمد بابا ساکن لال بازار سری نگر اور محمد لطیف ساکن سری گفوارہ اننت ناگ کے طور پر ہوئی ہے ۔
حکام نے بتایا کہ ان کے پس منظر کی ویریفکیشن سے یہ بات سامنے آئی کہ فردوس کے خلاف پہلے بھی این ڈی پی ایس ایکٹ کے تحت پولس اسٹیشن بجبہاڑہ اور این سی بی جموں میں مقدمے درج ہیں جب کہ جان محمد بابا بھی اس سے قبل این سی بی جموں کے درج کردہ ایک کیس میں ملوث تھے ۔
انہوں نے کہا کہ تحقیقات میں مزید یہ بات سامنے آئی کہ ضبط شدہ کھیپ محمد لطیف سے منگوائی گئی تھی، جو غیر قانونی ذرائع سے بین ریاستی نقل و حمل کی سہولت فراہم کر رہا تھا۔
حکام نے بتایا کہ سرینگر میں این سی بی کے دفتر کا قیام، جموں و کشمیر میں انسداد منشیات کے نفاذ کو مضبوط بنانے کے لیے مرکزی حکومت کی وسیع حکمت عملی کا حصہ ہے ۔
انہوں نے مزید کہا کہ این سی بی منشیات کے کاروبار کو روکنے ، نوجوانوں کو اس کے نقصان دہ اثرات سے بچانے ، اور جموں وکشمیر میں نافذ کرنے والی ایجنسیوں کے درمیان مضبوط تال میل کو یقینی بنانے کے لیے پرعزم ہے ۔
حکام نے شہریوں سے اپیل کی ہے کہ وہ منشیات کی اسمگلنگ کے خلاف جنگ میں تعاون کریں اور ایم اے این اے ایس نیشنل نارکوٹکس ہیلپ لائن نمبر۱۹۳۳کے ذریعے منشیات کی سرگرمیوں کے بارے میں معلومات شیئر کریں۔
انہوں نے اس بات کی یقین دہانی کرائی کہ اطلاع دینے والوں کی شناخت کو صیغہ راز میں رکھا جائے گا۔
اس دوران پولیس نے شمالی کشمیر کے قصبہ سوپور میں دو منشیات فروشوں کو گرفتار کرکے ان کی تحویل سے ممنوعہ مواد بر آمد کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن سوپور کی ایک پارٹی نے بابا موٹرز کے نزدیک بسم اللہ کالونی میں ناکے کے دوران دو افراد کو دھر لیا۔
ترجمان نے کہا کہ تلاشی کے دوران ان کی تحویل سے سپاسمو پروکسیون پلس کیسول بر آمد کئے گئے جس کے بعد دونوں کو گرفتار کیا گیا۔
گرفتار شدگان کی شناخت زبیر احمد شالہ ولد غلام نبی شالہ ساکن صدیق کالونی سوپور اور برہان ایوب ڈار ولد محمد ایوب ڈار ساکن مز بگ فروٹ منڈی سوپور کے طور پر ہوئی ہے ۔
بیان میں کہا گیا کہ اس سلسلے میں پولیس اسٹیشن سوپور میں این ڈی پی ایس ایکٹ کے تحت ایک کیس درج کیا گیا اور مزید تحقیقات شروع کی گئی۔انہوں نے کہا کہ سوپور پولیس منشیات کی بیخ کنی کے لئے پر عزم ہے ۔
پولیس نے عوام سے ہوشیار رہنے کی اپیل کی ہے اور منشیات سے متعلق کسی بھی سرگرمی کے متعلق پولیس کو اطلاع دینے کی اپیل کی ہے ۔
ادھرپولیس نے جموں میں ایک منشیات فروش کو گرفتار کرکے اس کی تحویل سے ہیروئن جیسا ممنوعہ مواد بر آمد کیا ہے ۔
ایک پولیس ترجمان نے بتایا کہ پولیس اسٹیشن گنگیال کی ایک پارٹی نے پورمنڈل موڑ جموں میں ایک ناکے پر سانبہ سے جموں کی طرف آ رہے ایک شخص کو روکا۔
ترجمان نے کہا کہ تلاشی کے دوران اس کی تحویل سے تقریباً ۲۵۸گرام ہیروئن جیسا ممنوعہ مواد بر آمد کیا گیا جس کے بعد اس کو بر سر موقع ہی گرفتار کیا گیا۔
ملزم کی شناخت لووش چودھری ولد پرم جیت چودھری ساکن رام گڑھ سانبہ کے طور پر کی گئی ہے ۔
بیان میں کہا گیا کہ اس سلسلے میں پولیس اسٹیشن گنگیال میں این ڈی پی ایس ایکٹ کے تحت زیر ایف آئی آر نمبر۲۰۲۵/۹۹؍ایک مقدمہ درج کیا گیا اور مزید تحقیقات شروع کی گئی۔
ترجمان نے کہا کہ اس مقدار میں ہیروئن کی بر آمدگی جموں پولیس کے لئے ایک بڑی کامیابی ہے ۔ان کا کہنا ہے کہ جموں پولیس منشیات کی بیخ کنی کیلئے پر عزم ہے ۔انہوں نے لوگوں سے اس سلسلے میں بھر تعاون کرنے کی اپیل کی ہے ۔