تو صاحب اپنے وزیرا علیٰ‘ عمرعبداللہ شکایت کررہے ہیں …… اس بات کی شکایت کررہے ہیں کہ…… کہ اونتی پورہ میں ہی آل انڈیا میڈیکل سائنسز(ایمز) تعمیر کرنے میں سیاست کار فرما تھی اور…… اور اس جگہ اور مقام کے تعین کی وجہ سے اس پروجیکٹ کی تکمیل میں تاخیر ہو ئی …… اور سو فیصد ہو ئی۔ ہمیں تو لگ رہا تھا کہ عمرعبداللہ کے سر پر جو ایک آدھ بال ہیں …… انہوں نے وہ بال دھوپ میں سفید نہیں کئے ہیں اور ان کی سمجھ میں یہ بات آجانی چاہئے یا اب تک آگئی ہو گی کہ …… کہ اگر سیاست میں سیاست نہیں ہو گی تو…… تو پھر کہاں ہو گی۔ ان کے بقول ایمز کو انونتی پورہ میں ہی بنانے کی سیاسی وجوہات تھیں تو…… تو کسی اور جگہ تعمیر نہ کرنے کی بھی سیاسی وجوہات ہی ہو تیں …… اور یہ بات عمرصاحب کو سمجھ میں آجانی چاہئے اور…… اور اس لئے آ جانی چاہئے کیونکہ بالآخر یہ بھی تو سیاستدان ہی ہیں …… کچھ اور نہیں ……بالکل بھی نہیں۔ انہوں نے بھی…… ان کی حکومت نے بھی کئی ایسے کام کئے ہوں گے…… جو نہیں کئے جانے چاہئے تھے…… لیکن وہ کام ہو ئے اورسیاسی وجوہات کی بنا پر ہی ہو ئے۔سیاست میں صاحب اتنا تو چلتا ہے…… جب ایمز کیلئے جگہ کا انتخاب کرنا تھا اور اگر اس وقت عمر عبداللہ صاحب مسند اقتدار پر تشریف آور ہو تے تو…… تو اللہ میاں کی قسم انہوں نے بھی اور باتوں کے علاوہ اس بات کو بھی ملحوظ نظر رکھا ہوتا …… سیاست کو رکھا ہو تا …… کہ اگر سیاستدان سیاست نہ کرے تو …… تو کیا کرے۔ رہی بات کہ …… کہ ایمز اونتی پورہ کی تکمیل میں تاخیر …… یقینا تاخیر ہو ئی اور سو فیصد ہو ئی ہے…… اس لئے بھی ہو ئی ہے کہ جموں کا ایمز تو اب ایک سال سے چل رہا ہے اور کشمیر کے ایمز کی تکمیل میں اب بھی ایک تا ڈیڑھ سال باقی ہے…… تو…… تو وزیر اعلیٰ صاحب اپنے دل پر ہاتھ رکھ کر بولیں کہ …… کہ کیا تاخیر کی وجہ صرف یہ ہے کہ پی ڈی پی حکومت نے جنوبی کشمیر میں اس اہم ادارے کو بنانے کا فیصلہ کیا…… یا تاخیر کی کچھ اور بھی وجو ہات ہیں …… ہمیں یقین ہے کہ…… کہ عمر عبداللہ صاحب سمجھ جائیں گے…… یہ سمجھ جائیں گے کہ تاخیر کے کچھ اور بھی عوامل ہیں جن کا سیاست کے ساتھ کچھ لینا دینا نہیں ہے…… بالکل بھی نہیں ہے…… ہے نا؟
