مانسون کے چلتے اگلے دس سے پندرہ دن بہت اہم ہیں:گرگ

کشمیر کے ڈویڑنل کمشنر انشول گرگ نے جمعرات کو سیلاب کی حالیہ صورتحال سے نمٹنے میں کشمیری عوام کی ہمت اور تعاون کی تعریف کی۔انہوں نے کہا کہ اگلے دس سے پندرہ دن بہت اہم ہیں اور رہائشیوں کو موسم کے مشوروں پر سختی سے عمل کرنے کی تاکید کی۔
گرگ نے کہا کہ جہلم میں پانی کی سطح کم ہو گئی ہے لیکن اس بات پر زور دیا کہ ٹیمیں ’ہائی الرٹ‘ پر ہیں۔
صوبائی کمشنرنے جمعرات کو یہاں ایک پریس کانفرنس سے خطاب کیا۔
گرگ نے کہا کہ مونسوسن پیٹرن کے پیش نظر آنے والے۱۰سے۱۵ دن انتہائی اہم اور نازک ہیں جس دوران لوگوں کو ہوشیار رہنے اور متعلقہ محکموں کی طرف سے جاری کی جانے والی ایڈوائزریوں پر عمل کرنے کی ضرورت ہے ۔
صوبائی کمشنر نے سیلابی صورتحال سے نمٹنے کیلئے خاص طور پر جنوبی کشمیر کے لوگوں کے رول کی سراہنا کی۔
گرگ نے کہا کہ مقامی حکام بشمول فوج، پولیس، ایس ڈی آر ایف اور سول انتظامیہ کو پوری وادی میں تعینات کیا گیا ہے اور محکمہ فلڈ کنٹرول جہلم اور اس کے معاون ندیوں کی مسلسل نگرانی کر رہا ہے ۔
ان کا کہنا تھا کہ سنگم اور رام منشی باغ میں پانی کی سطح کم ہونا شروع ہو گئی ہے ۔
گرگ نے یقین دلایا کہ جہلم میں پانی کی سطح بلند ہونے کے باوجود پچھلے دو دنوں کے دوران کوئی بڑا نقصان نہیں ہوا ہے ۔
ان کا کہنا تھا’’میں حالات کو پرسکون اور لچک کے ساتھ سنبھالنے کے لیے لوگوں کو مبارکباد دینا چاہوں گا تمام ٹیمیں باریک بینی سے صورتحال کی نگرانی کر رہی تھیں‘‘۔انہوں نے رہائشیوں کو یقین دلایا کہ صورتحال قابو میں ہے اور اس اعتماد کا اظہار کیا کہ مسلسل تعاون کشمیر کو مانسون کے موسم میں محفوظ رکھے گا۔
گرگ کا کہنا تھا کہ ستمبر کے وسط تک جاری رہنے والے مانسون سیزن کی وجہ سے اگلے دو ہفتے انتہائی نازک ہیں۔
صوبائی کمشنر نے عوام کو محکمہ موسمیات کی طرف سے جاری کی جانے والی ہدایات پر عمل کرنے کا مشورہ دیا اور اس بات پر زور دیا کہ انتظامیہ چوبیس گھنٹے اپنی کارروائیاں جاری رکھے گی اور ہنگامی رابطہ نمبر فعال ہیں۔
گرگ نے کہا کہ ایس ڈی آر ایف اور این ڈی آر ایف کی ٹیمیں اہم مقامات پر رکھی گئی ہیں، اور۱۵۰سے زیادہ حساس علاقوں کی نگرانی کی جا رہی ہے ۔
ایک سوال کے جواب میں انہوں نے کہا کہ موبائل نیٹ ورک کے مسائل کو حل کرنے کی کوششیں، خاص طور پر بی ایس این ایل، وزیر اعلیٰ اور لیفٹیننٹ گورنر کی رہنمائی میں جاری ہیں۔
گرگ نے مزید کہا کہ پانی کی سطح کم ہونے کے باوجود صورتحال قابو میں ہے اور گھبرانے کی کوئی ضرورت نہیں ہے ۔ان کا کہنا تھا کہ انتظامیہ کسی بھی ممکنہ صورتحال سے نمٹنے کیلئے پوری طرح تیار ہے