کشمیر میں سیلاب کے مسئلے کا مستقل حل تلاش کیا جائیگا: رانا

وزیر برائے جل شکتی، جنگلات اور ماحولیاتی و قبائلی امور جاوید احمد رانا کا کہنا ہے کہ حکومت جموں و کشمیر میں سیلاب کی صورتحال پر گہری نظر رکھے ہوئے ہے ۔
رانا نے یقین دلایا کہ اس مسئلے کا مستقل حل تلاش کرنے کی کوششیں کی جا رہی ہیں۔
وزیر نے ان باتوں کا اظہار جمعرات کو یہاں نامہ نگاروں کے ساتھ بات کرنے کے دوران کیا۔
رانا نے کہا’’وزیر اعلیٰ نے ذاتی طور پر جموں کی صورتحال کا جائزہ لیا اور راحت اور بحالی کے لیے تفصیلی ہدایات دیں‘‘۔
ان کا کہنا تھا کہ پورا محکمہ کل سے کشمیر کی صورتحال پر نظر رکھے ہوئے ہے اور انشاء اللہ ہم اس کا مستقل حل نکالیں گے ۔رانا نے لوگوں سے اپیل کی کہ وہ محتاط رہیں اور اس مشکل وقت میں حکومت اور انتظامیہ کے ساتھ تعاون کریں۔
وزیر نے کہا کہ حکومت لوگوں کی حفاظت کیلئے پرعزم ہے ، اور کشمیر کو بار بار ایسی آفات سے دوچار نہیں ہونے دیا جائے گا۔انہوں نے کہا کہ جہاں شدید بارشوں نے سیلاب کو جنم دیا ہے اور نقصان پہنچایا ہے وہاں انتظامیہ نے نقصانات کو کم کرنے کے لیے تیزی سے کام کیا ہے ۔
رانا نے کہا ’’ماضی میں بارشیں کئی دنوں تک جاری رہتی تھیں لیکن سیلاب نہیں آتے تھے ، جو کچھ ہم اب دیکھ رہے ہیں وہ حالیہ برسوں کی غفلت اور تباہی کا نتیجہ ہے ،یہاں تک کہ ہمارے دریائے جہلم کو بھی نقصان پہنچا ہے ۔