شدید بارشوں سے ریلوے ٹریک کو نقصان‘۵۸ٹرینیں منسوخ

جموں صوبے میں ریکارڈ توڑ بارشوں اور اچانک آئے سیلابی ریلوں کے نتیجے میں ریلوے ٹریفک شدید متاثر ہوا ہے جس کے سبب بدھ کے روز۵۸ٹرینوں کو منسوخ کر دیا گیا جبکہ ۶۴ٹرینوں کو مختلف اسٹیشنوں پر مختصر روٹ یا مختصر منزل تک محدود کر دیا گیا۔
ریلوے حکام کے مطابق، چکّی ندی کے علاقے میں شدید کٹاؤ اور فلیش فلڈز کے باعث ریل سروس کو دوبارہ معطل کر دیا گیا ہے ۔
شمالی ریلوے کے پبلک ریلیشن آفیسر (پی آر او)، جموں ڈویژن نے بتایا’’ اچانک سیلابی صورتحال کے سبب ریل ٹریفک کو فی الوقت روک دیا گیا ہے ۔ ٹرینیں اگلے احکامات تک منسوخ یا مختصر کر دی جائیں گی‘‘۔
بدھ کی صبح چند گھنٹوں کے لیے ریلوے ٹریفک بحال ہوا تھا اور جموں سے چھ ٹرینیں روانہ بھی ہوئیں، لیکن چکّی ندی میں دوبارہ طغیانی کے بعد ریل سروس دوبارہ معطل کرنا پڑی۔
یاد رہے کہ پچھلے۳۸گھنٹوں سے جموں خطے میں مسلسل بارشیں ہو رہی ہیں جس سے ریلوے اور سڑک ٹریفک بری طرح متاثر ہوا ہے ۔ منگل کو شمالی ریلوے نے کٹرا، اودھمپور اور جموں سے آنے اور جانے والی۱۸ٹرینیں منسوخ کی تھیں جبکہ بدھ کو یہ تعداد بڑھ کر ۲۲منسوخ اور۲۷مختصر منزل تک محدود ہو گئی۔
ریلوے حکام نے مزید بتایا کہ منسوخ ٹرینوں میں زیادہ تر کٹرا (ماتا ویشنو دیوی شرائن بیس کیمپ)، اودھمپور اور جموں سے روانہ ہونے والی ٹرینیں شامل ہیں، جبکہ ان مقامات کی طرف آنے والی کئی ٹرینیں بھی منسوخ کر دی گئی ہیں۔