سرینگر؍۱۷؍اکتوبر
جموں و کشمیر کے وزیر اعلیٰ عمر عبداللہ نے ریاست میں صنعتی تربیتی اداروں (آئی ٹی آئی) کے اہم کلسٹروں کو جدید بنانے کیلئے۴۷۵ء۴۱کروڑ روپے کے سرمایہ کاری منصوبوں کی منظوری پر وزیر اعظم نریندر مودی اور مرکزی وزیر برائے فروغِ ہنر و صنعت کاری جینت چودھری کا شکریہ ادا کیا ہے۔
یہ رقم ’پردھان منتری اسکلنگ اینڈ ایمپلائبیلٹی ٹرانسفارمیشن تھرو اپ گریڈڈ آئی ٹی آئیز‘ (پی ایم سیٹو) اسکیم کے تحت منظور کی گئی ہے، جس کا مقصد صنعتی تربیت کے بنیادی ڈھانچے کو بہتر بنانا اور نوجوانوں کو روزگار کے لیے درکار جدید مہارتوں سے آراستہ کرنا ہے۔
منصوبے کے تحت جموں آئی ٹی آئی کلسٹر کو جدید بنانے کیلئے۲۴۰کروڑ روپے مختص کیے گئے ہیں۔ اس کلسٹر کا مرکزی ادارہ آئی ٹی آئی جموں ہوگا، جبکہ آر ایس پورہ، نوشہرہ، سانبہ اور کٹھوعہ کے آئی ٹی آئی ادارے اس سے منسلک رہیں گے۔
اسی طرح سری نگر آئی ٹی آئی کلسٹر کی جدید کاری کیلئے۲۳۵ء۴۱کروڑ روپے منظور کیے گئے ہیں۔ اس کلسٹر میں آئی ٹی آئی سری نگر مرکزی ادارے کے طور پر کام کرے گا، جبکہ گاندربل، کنگن، بڈگام اور چرار شریف کے ادارے اس سے منسلک ہوں گے۔
ان دونوں منصوبوں پر عمل درآمد کے لیے مرکزی ادارے اور اس سے منسلک اداروں پر مشتمل نظام اپنایا جائے گا، جس کے تحت تربیتی ڈھانچے کو جدید بنانے، نئے دور کے تقاضوں کے مطابق کورس متعارف کرانے اور نصاب کو صنعتوں کی بدلتی ضروریات سے ہم آہنگ کرنے پر توجہ دی جائے گی۔ اس کے ذریعے ملکی اور عالمی سطح پر ہنرمند افرادی قوت کی بڑھتی مانگ کو بھی پورا کرنے کی کوشش کی جائے گی۔
وزیر اعلیٰ عمر عبداللہ نے کہا کہ یہ اقدام صنعتوں اور تربیتی اداروں کے درمیان روابط مضبوط بنانے، نتائج پر مبنی تربیت کو فروغ دینے اور جموں و کشمیر کے نوجوانوں کو صنعتوں میں کام کرنے کے لیے درکار مہارتیں فراہم کرنے میں اہم کردار ادا کرے گا۔ اس سے نوجوانوں کے لیے روزگار کے بہتر مواقع اور ذریعۂ معاش کے امکانات بڑھیں گے۔
عمرعبداللہ نے کہا کہ اس سرمایہ کاری سے صنعتی تربیتی اداروں کو جدید ہنر مندی مراکز میں تبدیل کرنے میں مدد ملے گی، تاکہ پیشہ ورانہ تربیت بدلتی معاشی ضروریات اور روزگار کے نئے مواقع کے مطابق برقرار رہے۔
۔۔۔۔۔ (ایجنسیاں)
