اننت ناگ اور جموں کے مادھو پور میں۴۴؍افراد کو بچایا

جنوبی کشمیر کے ضلع اننت ناگ کے درشن گام علاقے میں ایس ڈی آر ایف کی ایک ٹیم نے دریائے لدر میں پھنسے کم از کم ۲۲؍افراد کو بحفاظت نکال دیا۔
حکام نے بتایا کہ اننت ناگ کے درشن گام علاقے میں دریائے لدر میں ۲۲؍افراد پھنسے ہوئے تھے ۔انہوں نے کہا کہ ایس ڈی آر ایف کی ایک ٹیم نے انتہائی کاوشوں کے بعد ان کو بحفاظت نکال کر محفوظ مقام پر منتقل کیا۔
دریں ثنامادھو پور کے قریب پھنسے ہوئے ۲۲سی آر پی ایف اہلکاروں اور تین شہریوں کو بھارتی فوج نے ایک جرات مندانہ اور بروقت کارروائی کرکے بحفاظت او صحیح سلامت نکال لیا۔
مذکورہ افراد گزشتہ روز سے شدید موسمی صورتحال کے باعث ایک عمارت میں محصور تھے ۔
ایک دفاعی ترجمان نے بتایا کہ بدھ کی صبح چھ بجے کے قریب آرمی نے عمارت میں پھنسے ہوئے ۲۲سی آر پی ایف جوانوں اور تین شہریوں کو ہیلی کاپٹروں کے ذریعے محفوظ جگہ منتقل کیا۔
ترجمان نے مزید بتایا کہ جوں ہی آرمی نے پھنسے ہوئے جوانوں اور مقامی شہریوں کا ریسکیو کیا تو چند منٹوں کے اندر اندر ہی عمارت زمین بوس ہو گئی۔
ترجمان کے مطابق فوج کی ریسکیو ٹیم نے پیشہ وارانہ صلاحیتوں کو بروئے کار لا کر کم سے کم وقت میں۲۲سی آر پی ایف اہلکاروں اور تین شہریوں کو باہر نکال کر ایک بہت بڑے سانحہ کو رونما ہونے سے پہلے ہی ٹال دیا۔