سرینگر//
جموں کشمیر میں سرگرم دہشت گرد تنظیموں کو مالی مدد فراہم کرنے والے ایک منظم نیٹ ورک کا پردہ فاش کرتے ہوئے سرینگر کی این آئی اے عدالت نے دو اہم ملزمان پر دہشت گردی کی فنڈنگ سے متعلق دفعات کے تحت فردِ جرم عائد کر دی ہے ، جبکہ پاکستان میں مقیم لشکرِ طیبہ کے ایک اہم ہینڈلر سمیت مزید افراد کے خلاف بھی کارروائی جاری ہے ۔
یہ کیس پولیس اسٹیشن کاؤنٹر انٹیلی جنس کشمیر کے زیرِ تفتیش ایف آئی آر نمبر۲۰۲۴/۰۲سے تعلق رکھتا ہے ، جس میں غیر قانونی سرگرمیوں کی روک تھام ایکٹ یو اے پی اے کی دفعات۲۳‘۳۸‘۳۹‘۴۰؍اور آئی پی سی کی دفعہ۱۲۰بی کے تحت کارروائی عمل میں لائی گئی۔
پولیس کے مطابق شبیر احمد بٹ ولد غلام محمد بٹ ساکن کھادرموہ، کاکہ پورہ اور جاوید احمد یتو ولد عبدالمجید ساکن پتل باغ، پامپور نے بیرونِ ملک مقیم لشکرِ طیبہ کے ہینڈلر سمامہ عرف بابر عرف الیاس کی ہدایت پر ایک ٹرانس نیشنل فنڈنگ نیٹ ورک کا حصہ بن کر جموں و کشمیر میں سرگرم دہشت گردوں کو مالی معاونت فراہم کی۔
تحقیقات کے دوران یہ بات سامنے آئی کہ شابیر احمد بٹ نے عمرہ کی ادائیگی کے دوران سعودی عرب کے شہر مدینہ میں بڑی رقم لشکرِ طیبہ کے کارندوں سے وصول کی۔ اس کے بعد دیگر کشمیری زائرین کے ذریعے یہ رقوم کشمیر پہنچائی گئیں، جہاں شبیر نے انہیں ہندوستانی کرنسی میں تبدیل کرکے مقامی دہشت گردوں اور ان کے اہلِ خانہ کو فراہم کیا۔
تفتیشی ایجنسی کے مطابق جاوید احمد یتو نے شبیر کو پاکستان میں مقیم ہینڈلر سے رابطہ کرانے میں کلیدی کردار ادا کیا اور وہ اس پورے نیٹ ورک کی کڑیوں کو جوڑنے میں مرکزی حیثیت رکھتا ہے ۔
کیس کی تفتیش کو مزید وسعت دیتے ہوئے پولیس نے محمد ایوب بٹ ساکن کاٹھی پورہ، چاڈورہ، بڈگام اور محمد رفیق شاہ ساکن قمر واری، سری نگرکو بھی گرفتار کیا ہے ۔ ان کی تحویل سے الیکٹرانک آلات، بینک اسٹیٹمنٹس، ٹرانزیکشن ریکارڈز اور دیگر اہم دستاویزات برآمد ہوئی ہیں، جن سے دہشت گردی کے لیے حوالہ ذرائع کے استعمال کے ناقابلِ تردید ثبوت حاصل ہوئے ہیں۔
کاؤنٹر انٹیلی جنس کشمیر نے اس کارروائی کو دہشت گردی کے مالی نیٹ ورک کو توڑنے کی جانب ایک فیصلہ کن قدم قرار دیتے ہوئے کہا ہے کہ جو بھی فرد یا نیٹ ورک دہشت گردی کے فروغ میں مالی یا دیگر کسی صورت میں معاونت کرے گا، اس کے خلاف سخت کارروائی کی جائے گی۔
سی آئی کے کا کہنا ہے کہ جموں و کشمیر پولیس کی انسدادِ دہشت گردی حکمتِ عملی کا اہم حصہ بن کر وہ ایسی خفیہ سازشوں کو بے نقاب کرنے کا سلسلہ جاری رکھے گی۔
