’’بمراہ کو اگلے دونوں ٹیسٹ میچ کھیلنے چاہئیں‘‘ : انل کمبلے

مانچسٹر// سابق ہندوستانی لیگ اسپنر انل کمبلے کا کہنا ہے کہ تیزگیندباز جسپریت بمراہ کو سیریز کے آخری دو ٹیسٹ میچ ضرور کھیلنے چاہئیں۔
ہندوستان اور انگلینڈ کے درمیان چوتھے ٹیسٹ میچ کے آغاز سے قبل مانچسٹر میں جیو ہاٹ اسٹار کے ماہر انل کمبلے اور ہندوستان کے اسسٹنٹ کوچ ریان ٹین ڈیشکاٹے نے جیو ہاٹ اسٹار کے شو ’’فالو دی بلیوز‘‘ میں ٹیم سلیکشن پر گفتگو کی اور کھلاڑیوں کی انجری کے بارے میں اپ ڈیٹ دی۔ جسپریت بمراہ کی دستیابی، محمد سراج کی فٹنس اور رشبھ پنت کی ریکوری ٹائم لائن تک دونوں نے ٹیم کی ذہنیت اور حکمتِ عملی پر بھی بات کی کیونکہ سیریز اب آخری مرحلے میں داخل ہو چکی ہے۔
’’فالو دی بلیوز‘‘ پر بات کرتے ہوئے کمبلے نے باقی ماندہ ٹیسٹ میچوں کے لیے جسپریت بمراہ کی دستیابی کی اہمیت پر زور دیا۔
کمبلے نے کہا، ’’میں یقینی طور پر بمراہ کو اگلا میچ کھیلنے کی ترغیب دوں گا کیونکہ یہ بہت اہم ہے۔ اگر وہ نہیں کھیلتے اور ہندوستان یہ ٹیسٹ ہار جاتا ہے تو پھر سمجھ لیں کہ سیریز ختم ہو جائے گی۔ بمراہ کو باقی دونوں ٹیسٹ میچ کھیلنے چاہئیں۔ ہاں، انہوں نے پہلے کہا تھا کہ وہ صرف تین میچ کھیلیں گے، لیکن اس کے بعد لمبا وقفہ ہے۔ اگر انہیں آرام کی ضرورت ہو تو وہ گھریلو سیریز سے باہر رہ سکتے ہیں۔ لیکن فی الحال، بمراہ کو اگلے دونوں میچ ضرور کھیلنے چاہئیں۔‘‘
ہندوستان کے اسسٹنٹ کوچ ریان ٹین نے سیریز کے آخری دو ٹیسٹ میچوں میں بمراہ کی دستیابی کے بارے میں ٹیم کے فیصلے کے عمل پر روشنی ڈالی۔
انہوں نے کہا، ’’ہم مانچسٹر میں بمراہ کے بارے میں فیصلہ کریں گے۔ ہمیں معلوم ہے کہ وہ آخری دو ٹیسٹ میچوں میں سے کم از کم ایک کے لیے دستیاب ہوں گے، اور یہ بالکل واضح ہے کہ مانچسٹر میں جہاں سیریز داؤ پر لگی ہے، ہم انہیں کھیلانے کے حق میں ہیں۔ لیکن ہمیں تمام پہلوؤں پر غور کرنا ہوگا، جیسے ہمیں کتنے دن کھیلنے کا موقع ملے گا، ہماری جیتنے کی بہترین حکمت عملی کیا ہو سکتی ہے، اور یہ اوول میں ہونے والے میچ کے ساتھ کیسے میل کھاتا ہے۔ ہم آخری دونوں میچوں کو مجموعی طور پر سیریز کی بڑی تصویر کے حصے کے طور پر دیکھ رہے ہیں۔‘‘
اسسٹنٹ کوچ ریان نے محمد سراج کی تعریف کی اور مانچسٹر میں چوتھے ٹیسٹ سے پہلے ان کی فٹنس پر اپ ڈیٹ دیا۔
انہوں نے کہا، ’’ہم کبھی کبھی یہ بھول جاتے ہیں کہ ہم کتنے خوش نصیب ہیں کہ سراج جیسا کھلاڑی ٹیم میں ہے۔ ہو سکتا ہے کہ وہ ہمیشہ ویسی واپسی نہ کر سکے جیسی آپ ایک فاسٹ بولر سے توقع کرتے ہیں، لیکن دل کے معاملے میں وہ شیر کی طرح ہے۔‘‘
کوچ ریان نے کہا، ’’جب بھی ان کے ہاتھ میں گیند ہوتی ہے تو ہمیشہ محسوس ہوتا ہے کہ کچھ نہ کچھ ہونے والا ہے۔ وہ کبھی بھی ورک لوڈ سے نہیں گھبراتے، اسی لیے یہ اور بھی ضروری ہے کہ ہم ان کے کام کے بوجھ کا درست طریقے سے بندوبست کریں اور یہ یقینی بنائیں کہ وہ اپنی بہترین کارکردگی دینے کے لیے مکمل طور پر فٹ رہیں۔ ہم مانچسٹر ٹیسٹ کے قریب پہنچ کر فائنل پلئینگ کمبینیشن کا فیصلہ کریں گے، خاص طور پر ہرشت رانا کی صورتحال کو مدنظر رکھتے ہوئے۔ جہاں تک سراج کی بات ہے، انہیں گیند بازی کے دوران چوٹ لگی تھی، انہوں نے اپنی طرف آتی ہوئی گیند دیکھی اور اسے روکنے کی کوشش کی۔ یہ محض ایک کٹ ہے، لیکن ہمیں یہ جانچنا ہوگا کہ یہ کتنا سنجیدہ ہے۔ میڈیکل ٹیم انہیں ڈاکٹر کے پاس لے جائے گی اور یہ دیکھے گی کہ ٹانکے لگانے کی ضرورت ہے یا نہیں، اور یہ آئندہ چند دنوں میں ہماری منصوبہ بندی میں اہم کردار ادا کرے گا۔‘‘
چوتھے ٹیسٹ سے قبل رشبھ پنت کی فٹنس اور دھروو جوریل کے ممکنہ کردار پر انہوں نے کہا، ’’وہ میچ سے قبل مانچسٹر میں بلے بازی کریں گے۔ مجھے نہیں لگتا کہ کوئی بھی وجہ رشبھ کو میچ سے باہر رکھ سکتی ہے۔ تیسرے ٹیسٹ کے دوران انہوں نے کافی درد کے باوجود بیٹنگ کی، اور اب سے ان کی انگلی کی تکلیف بھی کم ہوتی جائے گی۔ وکٹ کیپنگ یقیناً ریکوری کے عمل کا آخری مرحلہ ہے؛ ہمیں یہ یقینی بنانا ہوگا کہ وہ آرام سے وکٹ کیپنگ کر سکیں۔ ہم دوبارہ وہ صورتحال نہیں دیکھنا چاہتے جو پہلے ہو چکی ہے جب ہمیں اننگز کے دوران وکٹ کیپر بدلنا پڑا تھا۔ پنت کو کافی آرام دیا جا چکا ہے اور ہم بس ان کی انگلی کو مکمل صحت یاب ہونے کا زیادہ سے زیادہ وقت دینا چاہتے ہیں۔ امید ہے کہ مانچسٹر میں پہلے ٹریننگ سیشن تک وہ مکمل طور پر فٹ ہو جائیں گے۔ دھروو جوریل بھی یقینی طور پر اس فہرست میں شامل ہیں۔ لیکن ظاہر ہے، رشبھ تھکے ہوئے ہیں، تاہم وہ اگلا ٹیسٹ کھیلیں گے اور دونوں ذمہ داریاں بلے بازی اور وکٹ کیپنگ نبھائیں گے ۔‘‘